Տեղեկացրել ենք, որ «Ալ. Սպենդիարյանի անվան օպերայի և բալետի ազգային ակադեմիական թատրոն» ՊՈԱԿ-ի տնօրենի թափուր պաշտոնը զբաղեցնելու համար մրցույթի արդյունքում ինը դիմումատուներից հաղթող են ճանաչվել՝ Անդրանիկ Ռոբերտի Արզումանյանը և Գագիկ Զալիկի Մանասյանը:
Արվեստագետների շրջանում ՕԲԱԱԹ-ի տնօրենի անառարկելի թեկնածու համարվող աշխարհահռչակ օպերային երգիչ, ՀՀ ժողովրդական արտիստ Բարսեղ Թումանյանի մրցույթից դուրս մնալու փաստն ափսոսանքով են ընդունել շատերը:
«Թատրոնին օդի նման պետք է Բարսեղի նման մեծության երաժշտի ներկայությունը, ի վերջո թատրոնը պիտի ղեկավարվի այդ ոլորտի նվիրյալների և մասնագետների կողմից»,-ֆեյսբուքյան էջում գրել է դիրիժոր Վարդան Հակոբյանը:
«Ցավում եմ շատ, որ «ընտրող հանձնաժողովը» չհասկացավ և չգնահատեց Բարսեղ Թումանյանի անձնազոհությունը և նրա ներկայության անհրաժեշտությունը թատրոնում»,- գրել է օպերային երգչուհի Հասմիկ Թորոսյանը:
Նշենք, որ իր` Բարսեղ Թումանյանի գնահատմամբ՝ մրցույթն օբյեկտիվ չէր:
