ՀՀ Պաշտպանության նախարար Սեյրան Օհանյանն այսօր՝ լրագրողների հետ հանդիպման ժամանակ անդրադարձավ Ավետիսյանների 7 հոգանոց ընտանիքի սպանության մեջ մեղադրվող, Գյումրիի ռուսական ռազմաբազայի զինծառայող Վալերի Պերմյակովի խնդրին՝ նշելով.
«ՌԴ Պն ղեկավարությունն էլ է շատ բացասական վերաբերվում այդ դեպքին: Այն այսօր իրավական ոլորտում է գտնվում: Այդ դեպքից հետո լուրջ աշխատանք ենք կատարել, որպեսզի Գյումրիի բնակչության և 102-րդ ռազմաբազայի զինծառայողների լավ հարաբերությունները պահպանվեն, ինչպես եղել է նախկինում»:
Խոսելով շքեղ մեքենաներով քաղաքում շրջող զինվորականների մասին՝ Սեյրան Օհանյանը հավաստիացրեց, որ բարձրաստիճան ղեկավարությունն առավոտից մինչև երեկո զբաղված է բանակի գործերով:
«Եթե այդպիսի փաստեր կան, կարող եք մեզ ասել, մենք զբաղվենք դրանով»,-նկատեց նախարարը:
Հարցին, թե արդյոք նախատեսվո՞ւմ է երկարացնել զինվորական ծառայության ժամկետները, նախարարը պատասխանեց, որ ոչ:
Անի Կարապետյան
