«ՀՀԿ-ում կատարվող փոփոխությունները իրավիճակը որոշ չափով փոխում են: Այն սկսվեց վարչապետ Կարեն Կարապետյանի՝ քաղաքական դաշտ մուտքով: Այս նախընտրական փուլում շատ հետաքրքիր են այն վերադասավորումները, որոնք սպասվում են իշխանության ներսում:
Փաստացի մեկ օրվա ընթացքում շատ դեմքեր հայտնվեցին ոչ իշխանական դաշտում, անգամ դիրքավորվեցին ընդդիմության հետ: Կարծում եմ, որ այն, ինչ հիմա կատարվում է, լուրջ պայմանավորվածությունների արդյունք է և տեղի է ունեցել Կարեն Կարապետյանի՝ հայաստանյան իշխանական ու քաղաքական դաշտ մուտք գործելուց առաջ»,-լրագրողների հետ հանդիպման ժամանակ նման տեսակետ հայտնեց քաղտեխնոլոգ Վիգեն Հակոբյանը:
Նրա կարծիքով՝ ոչ իշխանական դաշտում կատարվող ամեն քայլ վերահսկվում է իշխանության կողմից ու չի կարծում, որ պրոցեսները կարող են գնալ կոշտ սցենարով: Ինչ վերաբերում է Հովիկ Աբրահամյանին՝ Վիգեն Հակոբյանը նկատեց.
«Չեմ կարծում, որ որևէ քաղաքական կուսակցության կազմում կլինի: Չի բացառվում քողարկված աջակցությունը: Նա լուրջ ռեսուրսների է տիրապետում բոլոր առումներով: Չնայած դրանք ՀՀԿ-ից հեռանալու դեպքում բավականին կթուլանան»:
Անի Կարապետյան
