«Մենք արդեն պետք է միայն արձագանքային ռեժիմով գործենք, քանի որ նախապատրաստվելու ժամանակը բաց ենք թողել և դա՝ ի շնոհիվ մեր անորակ էլիտայի: Մենակ լեզուներին են զոռ տալիս: Երկիրը մահացու վտանգների առջև է կանգնած: Չեմ մոռանա՝ մարտի 30-ին ասացին, որ ցանկանում են քննարկել ընտրական օրենսգիրքը: Երկու օր անց սկսվեց պատերազմը: Այնքան անհեռատես են, որ անգամ պատերազմի հոտը գալիս է, իրենք ամբողջ եռանդով 4+4+4 են քննարկում: Վերցրեք մեր նահատակների ցուցակը: Դուք տեսե՞լ եք, որ զոհվեն կամ վիրավորվեն նրանց որդիները: Զոհվում է առողջ, սովորական հայը, ոչ թե իշխանականի կամ ընդդիմադիրի տղան: Այս սխալների միակ մեղավորը մեր էլիտան է: Եթե ազգը գլուխ չունի, մարմինը միշտ հարված է ստանալու»,-այսօր՝ լրագրողների հետ հանդիպման ժամանակ ասաց կառավարման փորձագետ Հարություն Մեսրոբյանը:
Կառավարման փորձագետը ցավ է հայտնում, որ լրատվամիջոցներում և սոցիալական ցանցերում գերտերություններին սիրաշահում են կամ վատ են խոսում նրանց հասցեին.
«Ամեն մեկն իր էշն է քշում: Գերտերություններին կամ սիրաշահում են, կամ հաչում են նրանց վրա: Բա դա նորմա՞լ է: Մենք հիմա ծանրագույն փուլ ենք անցնում և պետք է գիտակցենք, որ ոչ մի գերտերություն հայության շահը չի պաշտպանի: Իրենք ունեն իրենց շահերը: Ոչ պետք է ծնկի գալ, ոչ՝ հաչել: Լուրջ խաղ է գնում, փաստորեն կյանքի ու մահի պատերազմ: Լավ, այսքան զգուշացումները չլսեցիք, հիմա գոնե մի շարունակեք այդպես: Իմացե՛ք, մենք մահացու վտանգավոր ենք թուրքերի համար: Եվ ԱՄՆ-ում, և՛ ՌԴ-ում և՛ Եվրոպայում մենք ուժեղ հայկական համայնքներ ունենք և օր առաջ նրանք պետք է լծվեն լոբբինգով: Ամբողջ աշխարհին պետք է մեկ բան հասկացնենք.Արցախն ատամներով պահելու ենք: Նրանք այս գաղափարի հետ պետք է հաշտվեն»:
Խոսելով զենքի մասին՝ Հարություն Մեսրոբյանը նշեց.
«Մենք սխալը սխալի հետևից ենք անում: Չի՛ կարելի սոցցանցերում, ԶԼՄ-ում գոռալ-գոչել, թե փող ուղարկեք, որ զենք առնենք: Դուք հասկանո՞ւմ եք՝ տարբեր պետություններ ունեն իրենց օրենսդրությունը, և այնտեղ ապրող հայը, եթե սկսի զենքի համար փող ուղարկել, խնդիրներ է ստեղծելու: Տարրական բան եմ ասում: Մի՛ գրեք, որ ուղարկողը խնդիրներ չունենա»:
Անի Կարապետյան
