Թարմացված․ Արծվաշենն Ադրբեջանի օկուպացիայի ներքո է արդեն 30 տարի, հիշեցնում է ՀՀ վարչապետը:

«Մենք ասո՞ւմ ենք, որ Արծվաշենը պետք է վերադառնա, այո, ասում ենք: Բայց նաև հետևյալ հարցը կա: Ենթադրենք, քաղաքական պայմանավորվածությունը ձեռք բերվեց, ընդ որում` արդեն ձեռք է բերվել: Կա 2 տարբերակ` ունենք սահմանի գիծ և դրանից այնկողմ գտնվող էքսկլավը պետք է վերադառնա ՀՀ-ի իրավազորության ներքո: Բայց պրակտիկ դա անելու համար ի՞նչ է պետք: Պետք է հասկանալ` էդ էքսկլավի սահմանը որտե՞ղ ա գտնվում, պետք է կոնկրետացնել` ինչքա՞նն ա Արծվաշենը: Ընդեղ հո գծած չի հողի վրա` Էս Արծվաշենն ա, էս Արծվենը չի: Որպեսզի ճշգրտենք, պետք է իրավական հիմքերով ապահովված քարտեզը վերարտադրենք, որից հետո արդեն քաղաքական պայմանավորվածությունը պետք է տեղի ունենա»,- Գավառում ՔՊ նիստի ժամանակ հայտարարեց Փաշինյանը:

Թարմացված․ Ադրբեջանը բարձրացնում է 4 գյուղի հարցեր, ՀՀ-ն բարձրացնում է 32 գյուղի հարց, որոնց կենսական նշանակության տարածքները բռնազավթված են, այդ թվում` Գեղարքունիքի մարզում։ Գավառում այս մասին ՀՀ վարչապետ Նիկոլ Փաշինյանը հայտարարել է «Քաղաքացիական պայմանագիր» կուսակցության նախաձեռնող խմբի նիստում` անդրադառնալով Ադրբեջանի նախագահ Իլհամ Ալիևի վերջին հայտարարություններին։
«Մենք ասում ենք, որ ՀՀ և Ադրբեջանի միջև օկուպացված տարածքներ չպետք է գոյություն ունենան։ Հետևաբար, երբ պարզվի, որ ՀՀ-ն է ինչ-որ տարածքներ է իր վերահսկողության տակ պահում, որը դե յուրե պատկանում է Ադրբեջանին, ՀՀ-ն պետք է այդ տարածքներից դուրս գա, իսկ այն տարածքները, որոնք դե յուրե պատկանում են ՀՀ-ին, սակայն Ադրբեջանն է պահում իր վերահսկողության տակ, Ադրբեջանը պետք է դուրս գա։ Նման քաղաքական պայմանավորվածություն կա, սա գործնականում իրականում հնարավոր չէ իրագործել` առանց փոխհամաձայնեցված քարտեզի»,- ասել է նա։