Առողջապահության նախարարությունը առանձնահատուկ վերահսկողություն է սահմանելու մեծ ծավալով պետպատվեր իրականացնող բուժհաստատությունների նկատմամբ: Թեմային այսօր նախ անդրադարձել է նախարար Արսեն Թորոսյանի խոհրդական Աշոտ Սարգսյանը, ապա նախարարն է ներկայացրել որոշակի մանրամասներ:
«Մենք հետևողական ենք առողջապահական ոլորտում մեր կողմից իրականացվող փոփոխություններին: ՀՀ Առողջապահության նախարար Արսեն Թորոսյանի հանձնարարությամբ հանրապետության տարբեր բժշկական կենտրոններում մոտ ապագայում կլինեն նախարարության աշխատակիցներ, ում դուք կարող եք տեղում դիմել խնդիրների դեպքում: Այս մոդելի կիրառումը սկսվում է ինձնից եւ ուրեմն, ես այսօրվանից կլինեմ «Արմենիա» ԲԿ-ում (Հանրապետական հիվանդանոց), որպեսզի հետևեմ պետպատվերով մատուցվող ծառայությունների որակին»,- նշել է Աշոտ Սարգսյանը։
«Այո՛։ Փոփոխությունների հանդեպ հետևողական ենք լինելու։ Մոտ 2 ամսից ՀՀ ԱՆ պետական առողջապահական գործակալությունը մշտական ներկայացուցիչներ է ունենալու մայրաքաղաքի 1մլրդ և ավելի դրամ պետական պատվեր ունեցող բժշկական հաստատություններում, ովքեր տեղում վերահսկելու են ծառայությունների մատուցման ընթացքը»,- հավելել է առողջապահության նախարարը։
