Զբոսաշրջությունը Թումանյանի տարածաշրջանի համար կարող է լինել տնտեսության զարգացման գերակա ճյուղերից մեկը: Դրա համար անհրաժեշտ նախապայմանները բնությունը մեր տարածաշրջանին արդեն տվել է, սակայն ոլորտի զարգացմանը խանգարող հանգամանքներ էլ կան: Ու դրանք պայմանավորված են ոչ միայն ենթակառուցվածքների թերի լինելով, այլև շրջակա միջավայրի անմխիթար վիճակով: Զբոսաշրջիկներից շատերը զարմանում ու նաև զայրանում են՝ մեր այդքան հարուստ հուշակոթողների շրջակայքի վիճակը տեսնելով: Ու շատերի համար անհասկանալի է մնում, թե ինչպես կարող է այդքան հարուստ մշակույթ ունեցող ժողովուրդն այդքան անփույթ լինել այն պահպանելու հարցում: