Գերմանիայի դաշնային խորհրդարանը (Բունդեսթագ) ձայների գերակշիռ մեծամասնությամբ այսօր ընդունեց Հայոց ցեղասպանությունը դատապարտող բանաձևը: Քվեարկության արդյունքներով՝ եղել է ընդամենը 1 դեմ և 1 ձեռնպահ:
Պատմաբան, գերմաներենի մասնագետ Աշոտ Հայրունու կարծիքով՝ սա բեկումնային նշանակություն ունեցող փաստաթուղթ է, քանի որ Հայոց ցեղասպանությունը ճանաչվել է Օսմանյան պետության թիվ մեկ դաշնակցի կողմից, հստակ ամրագրված է Գերմանիայի մեղսակցությունը:
«Բունդեսթագի կողմից ընդունված Հայոց ցեղասպանությունը դատապարտող բանաձևը շատ ավելի մեծ ազդեցություն է գործելու թուրքական հասարակության վրա, քան այլ երկրների կողմից ընդունվածները, որովհետև Գերմանիան բարեկամ պետության է, ոչ թե թշնամի»-լրագրողների հետ հանդիպման ժամանակ նշեց պատմաբանը:
Անի Կարապետյան
