Հռոմի պապ Ֆրանցիսկոսը շվեյցարական RSI-ին տված հարցազրույցում Ռուսաստանին և Ուկրաինային բանակցելու կոչ է արել: Լրագրողի դիտարկմանը, ըստ որի՝ կարծիքներ կան, որ Ուկրաինան պետք է հանձնվի, քանի որ չի կարողանում հետ մղել ռուսական զորքերին, մի մասն էլ նշում է, որ այդկերպ կօրինականացնի ագրեսորի գործողությունները, Հռոմի պապը պատասխանել է․ «Ամենաուժեղը նա է, ով նայում է իրավիճակին ու մտածում ժողովրդի մասին։ «Բանակցել» բառը համարձակ բառ է: Երբ տեսնում եք, որ պարտություն եք կրում, որ գործերը լավ չեն ընթանում, պետք է համարձակություն ունենաք բանակցելու․․․ Ժամանակին բանակցե՛ք, միջնորդ երկիր փնտրե՛ք։ Շատ երկրներ կան, ովքեր պատրաստ են միջնորդի դեր ստանձնել։ Օրինակ, Թուրքիան։ Մի ամաչեք բանակցել, քանի դեռ ամեն ինչ ավելի չի վատթարացել»։

Թարմացված․ Ուկրաինայի նախագահ Վլադիմիր Զելենսկին քննադատել է Հռոմի պապին՝ սպիտակ դրոշ պարզելու կոչի համար:

«2500 կմ հեռավորության վրա՝ ինչ-որ տեղ, զբաղվել վիրտուալ միջնորդությամբ»,- ТАСС-ը մեջբերում է Զելենսկու հայտարարությունը:

Միևնույն ժամանակ, նա չի հիշատակել Հռոմի պապին՝ չնայած պարզ է, որ խոսքը հենց նրա մասին է. Վատիկանը գտնվում է Կիևից մոտ 2,4 հազար կմ հեռավորության վրա, նշում է լրատվամիջոցը:

Հիշեցնենք՝ ավելի վաղ Ֆրանցիսկոս պապը հայտարարել էր, որ պարտվող կողմը պետք է քաջություն գտնի՝ դա ընդունելու, և բանակցությունների գնա: