Արգենտինայի հավաքականի հարձակվող Լիոնել Մեսին որակազրկման պատճառով բաց կթողնի 2018 թվականի աշխարհի առաջնության ընտրական փուլում ընտրանու առաջիկա չորս հանդիպումները, հաղորդում է ՖԻՖԱ-ի պաշտոնական կայքը:
ՖԻՖԱ-ի կարգապահական կոմիտեն «Բարսելոնայի» ֆուտբոլիստին որակազրկել է Չիլիի հետ հանդիպման (1-0) եզրային մրցավարներից մեկի հասցեին վիրավորական խոսքեր հնչեցնելու համար: Հարձակվողը նաև տուգանվել է 10 հազար շվեյցարական ֆրանկով:
Մեսիի որակազրկումը կսկսվի Բոլիվիայի հետ այսօր կայանալիք հանդիպումից: Արգենտինացիները հարավամերիկյան ընտրական գոտու 13-րդ տուրից հետո ընթանում են 3-րդ տեղում, իսկ Բոլիվիայի հավաքականը զբաղեցնում է 9-րդ հորիզոնականը:
