20 տարի շարունակ նրանք գալիս են Հայաստան, այցելում Ծիծեռանակբերդ, ներողություն են խնդրում հայ ազգից ու պահանջում, որպեսզի ընդունվի, ճանաչվի Հայոց ցեղասպանությունն ու անպայման փոխհատուցում լինի,-Հայաստանում է Գերմանիայում գործող թուրքական «Միություն Ընդդեմ Ցեղասպանության» կազմակերպության ներկայացուցիչ Մահմուդ Ուզունին, ով այսօր՝ լրագրողների հետ հանդիպման ժամանակ ներկայացրեց իրենց կազմակերպության հայտարարությունը.
«Թուրքիայի հանրապետությունը 101 տարի շարունակ հերքում է 1915 թվականի ցեղասպանությունը: Արդեն 101 տարի է՝ թուրքական ժխտողական քաղաքականությունը շարունակում է մարդկության դեմ ուղղված հանցագործությունների իրագործումը: Կանգնելով իր հանցակից Ադրբեջանի կողքին՝ հրահրում է պատերազմ՝ հարձակվելով Արցախի վրա ու ծրագրում նոր ցեղասպանություն: 100 տարի շարունակ ընդդեմ քուրդ ժողովրդի ազգային իղձերի ցեղասպանական գործողություններ է իրականացնում՝ կոտորելով ու բռնի տեղահանելով նրանց: Ալևի ժողովուրդներին դարձնում է ցեղասպանության թիրախ՝ հրահրելով ջարդեր ու փոխելով նրանց բնակության վայրերի ժողովրդագրական պատկերը:
Ելնելով այդ բոլոր պատճառներից՝ համայն մարդկության առջև հայց ենք ներկայացնում ընդդեմ քրեական հանցագործ ցեղասպան Թուրքիայի և նրա հանցակից Ադրբեջանի:
Մեր բողոքն ենք հայտնում ընդդեմ նրանց ուղղորդող և կառավարվող ցեղասպան գաղափարախոսության, ընդդեմ նրանց նյութական և բարոյական աջակցության ցուցաբերողների, ընդդեմ նրանց զինող դաշնակիցների:
Մեր ձեռքերը ցեղասպանությունը ժխտողների օձիքին է, քանի որ ժխտումը ցեղասպանության շարունակությունն է: Հե՛՛տ քաշեք ձեր արյունոտ ձեռքը ԼՂՀ-ից, ճանաչե՛ք 1915թվականի Հայոց ցեղասպանությունն ու ստանձնե՛ք դրա հետ կապված պարտավորությունները, ներողություն խնդրե՛ք ցեղասպանությունից տուժած ժողովուրդներից.հայեր, ասորիներ,հույներ, եզդիներ…»,-ասված էր հայտարարության մեջ:
Անի Կարապետյան
