Լրագրող Ոսկան Սարգսյանը ֆեյսբուքյան իր էջում գրում է․ 

Իջևանում 37-ամյա տղամարդը փորձել է բռնաբարել 82-ամյա ուսուցչուհուն, նրան ծեծի է ենթարկել

Երկու օր առաջ Իջևան քաղաքում տղամարդը գիշերով ջարդել է Բլբուլյան փողոցի միջնամասում գտնվող բնակարանի պատուհանը, ներխուժել բնակարան, ուր միայնակ ապրում է 82-ամյա ռուսերենի ուսուցչուհին։ Ուսուցչուհին ամուսնացած չէ, զավակներ չունի, տարիներ առաջ անցել է կենսաթոշակի։ Տղամարդը փորձել է բռնաբարել տարեց ուսուցչուհուն, սակայն դիմադրության հանդիպելով ՝ ծեծել է նրան, բազում հարվածներ հասցնելով դեմքին և մարմնի տարբեր մասերին։ Իր ստոր նպատակին չհասնելով՝ տղամարդը փախուստի է դիմել։ Իջևան քաղաքից ստացված տեղեկություններով՝ բռնաբարության փորձ կատարածը նախկինում նույն հանցագործության համար դատապարտված 37-ամյա իջևանցի Վազգեն Օհանյանն է։

2011թվականի հոկտեմբերի 30-ին` գիշերը ժամը 03.00-ի սահմաններում, Վազգեն Օհանյանը բաց դռնից մուտք է Իջևան քաղաքի Այգեստան փողոցի տներից մեկը և փորձել բռնաբարել 69-ամյա, թոշակառու Սուսաննա Բեկնազարյանին:

Վերջինս սկսել է բղավել, օգնության կանչել, ինչից հետո Սուսաննայի սենյակ է մտել նրա թոռը` 19-ամյա Գարուշ Խաչատրյանը, որից հետո Վազգեն Օհանյանը դիմել է փախուստի: Տավուշի մարզի առաջին ատյանի դատարանի որոշմամբ նա այդ հանցագործության համար ազատազրկվել է 2 տարի 8 ամիս ժամկետով:

Ծեծված ուսուցչուհին այժմ բուժում է ստանում Իջևանի բժշկական կենտրոնում։ Իջևան քաղաքում տեղեկություն է տարածվել, թե իբր ծեր, ծեծված ուսուցչուհին մահացել է, սակայն այդ լուրը կեղծ է։