Խորհրդարանում, Սահմանադրական դատարանի դատավորի թափուր տեղի համար նախագահի առաջադրած թեկնածուի շուրջ քննարկման ժամանակ, «Իմ քայլը» խմբակցության պատգամավոր Տաթև Հայրապետյանը իր ելույթում անդրադարձավ դատավորների արտահերթ ժողովին: «Դատավորների ժողովն իր հայտարարության տեքստում հստակ արձանագրեց, որ ԲԴԽ անգործությունը չի արտահայտում դատավորների անհատական կամքը, և այդ մարմինը չի երաշխավորում դատավորների անկախությունը։ Եթե ԲԴԽ-ն ի վիճակի չէ ի կատար ածել իր պարտավորությունները, ուրեմն միգուցե կա հստակ անհրաժեշտություն, որպեզի ԲԴԽ անդամները հետևեն պարոն Հարությունյանի օրինակին»,- ասաց նա՝ նկատի ունենալով ԲԴԽ նախագահ Գագիկ Հարությունյանին։ Պատգամավորի համոզմամբ՝ հակառակ դեպքում հասարակություն և դատական համակարգի միջեւ անջրպետն ու անվստահության մթնոլորտն ավելի կխորանա։
«Այո, ԲԴԽ-ն չպետք է մատնվի անգործության, ԲԴԽ անդամները գործ ունեն անելու՝ նրանք պետք է հրաժարականի դիմումներ ներկայացնեն և նպաստեն դատական համակարգի առողջացման և դատավորների հանդեպ վստահության վերականգնման գործընթացին։ Հույս ունեմ, որ ԲԴԽ առաջիկա նիստում անդամները համարժեք կգնահատեն իրավիճակը և համապատասխան որոշումներ կկայացնեն»,- ասաց Հայրապետյանը։ Հիշեցնենք, որ ԲԴԽ նախագահ Գագիկ Հարությունյանը հրաժարականի դիմում էր ներկայացրել մայիսի 24-ին՝ ասելով, որ հաշվի առնելով դատական իշխանության և դատավորների առնչությամբ ընթացող զարգացումները՝ նպատակահարմար չի համարում իր հետագա աշխատանքը որպես ԲԴԽ նախագահ։ Դատավորների ընդհանուր ժողովն էլ մայիսի 27-ին արտահերթ նիստ հրավիրեց՝ արձանագրելով, որ ԲԴԽ-ն չի ապահովում դատավորների անկախությունը։
Դիտեք նաև՝
