Հինգշաբթի գիշերը Երևանի «Զվարթնոց» օդանավակայանի սահմանապահ ծառայությունը մերժել է Հայաստանում «Ռոսսոտրուդնիչեստվոյի» նախկին ղեկավար Վիկտոր Կրիվոպուսկովի մուտքը ՀՀ։ Այս մասին ռուսական ՏԱՍՍ լրատվական գործակալությանը հաղորդել է անձամբ ինքը՝ Կրիվոպուսկովը։

«Ինձ երկիր չթողեցին, Հայաստանի համար անցանկալի մարդ հայտարարեցին և անձնագիրս խլեցին։ Պաշտոնական թուղթը ցույց չտվեցին, բայց դե ես հասկանում եմ, որ եթե սահմանը չբացեցին ինձ համար, անձնագիրս չվերադարձրին... Ինձ ասացին, որ հենց այսօր վերադառնամ Մոսկվա»,- լրատվականի հետ զրույցում ասել է նա։

Կրիվոպուսկովը 2009-2013 թվականներին եղել է Հայաստանում «Ռոսսոտրուդնիչեստվոյի» գրասենյակի ղեկավարը։
Հայաստանի իշխանությունները դեռևս չեն մեկնաբանել Կրիվոպուսկովի հետ կապված միջադեպը։

Խմբագիր Սևակ Հակոբյանն, այս առիթով, գրում է․ 

Արդեն մոտս հստակ տպավորություն կա, որ ՀՀ մուտք գործելու արգելքները, իսկ ավելի ճիշտ՝ այդ արգելվածների ցուցակը ստացվել է, օրինակ, Ադրբեջանից, կամ Թուրքիայից։

Վիկտոր Կրիվոպուսկովը, ում այսօր առավոտյան արգելել են մուտք գործել ՀՀ, ասել է, որ իր մուտքը արգելված է եղել միայն Ադրբեջան, այն էլ դեռ սովետական ժամանակներից, իր՝ «Мятежный Карабах. Из дневника офицера МВД СССР» գրքի համար։ Օրինակ՝ միայն այս տողերը, կարծում եմ, հերիք կլիներ․ «Если бы Алиев младший родился бы до 1936 года, в его паспорте как и в паспорте его отца, было бы написано кавказский татарин или мусульманин. Национальность им придумал Сталин в 1936 году. До 1918 не было такого государства как Азербайджан. Даже символы у них были турецкие. Вся их история построена на лжи и фальсификациях»։

Ամեն բան ճիշտ է, բայց նաև հաշվի առնելով ադրբեջանցիների բարդույթավորված վիճակը և պատմության ու ճշմարտության հետ կռիվ տալու մոլուցքը՝ հասկանալի է։

Իսկ որևէ մեկը լսե՞լ է, որ Կրիվոպուսկովը ինչ-որ վատ բան ասած լինի, Հայաստանի, Արցախի, առհասարակ հայերի մասին. հակառակը, որքան տեսել եմ, կոպիտ ասած, այդ մարդը «մեր կողմից ա» եղել, միշտ։

Իսկ առանձնահատուկ Փաշինյանի մասի՞ն, ինչ-որ բան ասած կամ արած կա՞․ եթե եղել է, խնդրեմ, հղում տաք, տեսնենք, թե այդ ի՞նչ պետք ա ասած լիներ, որը դեռ ոչ մեկ Փաշինյանին չի ասել ու որի համար արժեր, այլազգի, հայերի սակավ բարեկամներից մեկին զրկել ՀՀ մուտք գործելուց։

Եթե այդպիսին էլ չկա, ուրեմն, իմ ասածն է՝ Հայաստան մուտքի թույլտվությունները և արգելումները այլևս կազմվում են Ադրբեջանում։