«Հրապարակ»-ը գրում է. «Չնայած Ապարան խոշորացված համայնքի ղեկավար Կարեն Եղիազարյանը՝ «Գնթունիքի» սեփականատերը, ըստ լուրերի, ջերմ հարաբերություններ է հաստատել իշխանության, մասնավորապես մարզի ՔՊ-ականների հետ և այցերի ժամանակ էլ ջերմ ընդունելություն է կազմակերպում Փաշինյանի համար, սակայն իշխանությունը չի մոռանում նրա ընդդիմադիր և նախկին լինելը: Դատախազությունն ապօրինի ծագում ունեցող գույքի անվան տակ ուզում է նրանից խլել մի շարք գույքեր, այդ թվում՝ կայացած «Գնթունիքի» բիզնեսը։
Եղիազարյանի և նրա կնոջ նկատմամբ վարույթ կա, որի շրջանակներում ուզում են բռնագանձել «Գնթունիքի» 100 տոկոս բաժնեմասը, նաև մի շարք անշարժ և շարժական գույք։ Եղիազարյանի նկատմամբ նաև քրեական գործ կա` ապօրինի ձեռնարկատիրության, պաշտոնի չարաշահման և հափշտակության մեղադրանքով: Վերջին ամիսներին նաև ստուգումներ են անում համայնքապետի ընտանիքին պատկանող բիզնեսներում և տուգանում»: