«Ծննդատները կապ չունեն որդեգրումների հետ»,- հունվարի 16-ին դատարանում լրագրողների հետ զրույցում ասաց երեխաների ապօրինի որդեգրման գործով մեղադրյալ, Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տնօրեն Ռազմիկ Աբրահամյանը:
Նա անպատասխան է թողել այն հարցը, թե ճի՞շտ են ծնողների պնդումները, որ ինքը գումար է առաջարկել լռության դիմաց։
Բազմաթիվ հարցերին ի պատասխան՝ նշել է. «Ավելորդ հարցեր եք տալիս»։
Նշենք, որ ծնողներից Հայկուհի Խաչատրյանը այսօր, երբ աղմկահարույց գործով դատական նիստն էր, մոտեցել է Ռազմիկ Աբրահամյանին և հարցրել , թե ինչո՞ւ էր իրեն մեկ միլիոն առաջարկում։
Հայկուհի Խաչատրյանը լրագրողներին պատմել է, որ անձամբ Ռազմիկ Աբրահամյանը իրեն 1 մլն դրամ է առաջարկել, ինքը հրաժարվել է։ Ծնողներից ոմանք, սակայն, մտածելով, որ գումարը տրվում է ըստ օրենքի, վերցրել են։
Ծնողները լրագրողներին նաեւ պատմել են, որ վերջին շրջանում գտել են 22-ամյա տղայի, ում որդեգրել են 1997 թվականին, բայց հիվանդանոցում ծնողներին ներկայացրել են, որ երեխան մահացել է։
Ռազմիկ Աբրահամյանն ավելի վաղ ասել էր, որ չի ընդունում մեղադրանքը և բողոքող կանայք իր դեմ արշավ են կազմակերպում. Հայկուհի Խաչատրյանը ի պատասխան Ռազմիկ Աբրահամյանի՝ ասաց, որ ինչպես ստում էր, որ իր երեխան մահացել է, այնպես էլ ստում է, որ իր դեմ արշավ է կազմակերպված։
