«Մարտի 1» -ի գործով Զաքար Հովհաննիսյանի սպանության մեջ մեղադրվող նախկին բարձրաստիճան ոստիկան Գեղամ Պետրոսյանը ազատ է արձակվել
Այսօր լրացավ Պետրոսյանի՝ երկու ամսով կալանքի տակ գտնվելու ժամկետը, սակայն ՀՔԾ-ի կողմից միջնորդություն չի ներկայացվել դատարան ժամկետը երկարաձգելու հարցով:
Կալանքից ազատ արձակվելուց հետո լրագրողների հետ զրույցում Գեղամ Պետրոսյանը ասաց.
«Զրոյական մեղադրանք է: Խոստացել են, որ մեկ ամսվա ընթացքում կհանեն»:
Հարցին ՀՔԾ-ն է խոստացե՞լ, Գեղամ Պետրոսյանն արձագանքեց. «Իմ փաստաբանն է խոստացել, ՀՔԾ-ն ի՞նչ կապ ունի»:
Հիշեցնենք, որ ՀՀ ոստիկանության զորքերի հրամանատարի տեղակալ 70–ամյա Գեղամ Պետրոսյանին Մարտի մեկի իրադարձություններից 10 տարի անց մեղադրանք է առաջադրվել հրազենի գործադրմամբ Զաքար Հովհաննիսյանին սպանելու համար:
