ՊՆ N զորամասում երեկ մահացու հրազենային վիրավորում ստացած սպա Միքայել Դանիելյանը Գեղարքունիքի մարզի Վահան գյուղից էր, կոչումով՝ ավագ լեյտենանտ։ Այս մասին «Փաստինֆո»-ին հայտնել է վարչական շրջանի ղեկավար Արշակ Մկրտչյանը:

Միքայելը 29 տարեկան էր, ամուսնացած, ունի երկու երեխա՝ որդի և դուստր։
«Հայրն իմ դասընկերն է։ Շատ օրինակելի ընտանիք է՝ բոլորի կողմից սիրված, հարգված, օրինակելի, այդ ընտանիքի մասին որևէ վատ բան ասել չեմ կարող»,- նշել է Մկրտչյանը՝ բնութագրելով Միքայելին որպես արտակարգ մարդ․ «Այդ երեխային ամբողջ գյուղը սիրել, հարգել է։ Կշռադատված, արտակարգ մարդ էր, ոչ մի թերություն չի ունեցել, որ կարողանամ ասել»։

2024թ. հունվարի 9-ին հաղորդում է ստացվել այն մասին, որ նույն օրը ժամը 11։30-ի սահմաններում, ՀՀ ՊՆ N զորամասի կրակային դիրքում հայտնաբերվել է նշված զորամասի ավագ լեյտենանտ Միքայել Դանիելյանի դին՝ հրազենային վիրավորումով։
Ըստ նախնական տվյալների՝ զինծառայողը մահացու վնասվածքն ստացել է իրեն ամրակցված ինքնաձիգից կզակի շրջանում արձակած կրակոցի հետևանքով։
Դեպքի առթիվ ՀՀ ՔԿ ԶՔԳՎ հինգերորդ կայազորային քննչական բաժնում, ՀՀ քրեական օրենսգրքի 522-րդ հոդվածի 2-րդ մասի 3-րդ կետով (մարտական հերթապահություն կամ մարտական ծառայություն կրելու ընթացքում զինծառայողին անզգուշությամբ ինքնասպանության հասցնելը), նախաձեռնվել է քրեական վարույթ։
Կատարվել է դեպքի վայրի զննություն, նշանակվել են համապատասխան փորձաքննություններ, հարցաքննվել են մի շարք վկաներ։
Կատարվում է նախաքննություն: Իրականացվում են անհրաժեշտ և անհետաձգելի բոլոր գործողությունները՝ զինծառայողի մահվան հանգամանքները լիարժեք պարզելու նպատակով։