Նախիջեւանի Ինքնավար Հանրապետության գերագույն խորհրդի նախագահ Վասիֆ Թալիբովը, որը հայտնի է տարօրինակ եւ ծիծաղելի սահմանափակումներ բովանդակող որոշումներով, այս անգամ արգելել է սմթարթֆոն եւ անդրոիդ բջջային հեռախոսներով աշխատակիցների եւ քաղաքացիների մուտքը բոլոր տեսակի պետական հաստատություններ:
Ինչպես հայտնում է Fakxeber.com կայքը, արգելքը վերաբերում է միջնակարգ դպրոցներից սկսած մինչեւ պետական հաստատություններ, խորհրդարան եւ հասարակական օբյեկտներ: Վասիֆ Թալիբովի կողմից նման որոշում ընդունվելու պատճառը չի բացահայտվում:
2014 թվականի հունվարի 1-ից արգելվել էր սմարթֆոն եւ անդրոիդ տեսակի բջջային հեռախոսներով մտնել Ադրբեջանի խորհրդարանի շենք: Այդտեղ մտնող անձինք պետք է շենքի մուտքում պահակային ծառայությանը հանձնեն իրենց մոտ գտնվող վերը նշված մոդելի հեռախոսները:
Ադրբեջանական ԶԼՄ-ների համաձայն` նման որոշման պատճառը բացատրվել էր խորհրդարանում տեղի ունեցող իրադարձությունների վերաբերյալ պաշտոնականից զատ տեսանյութերի հրապարակման հնարավորության արգելքով:
