Այսօր ԱԺ Տնտեսական հարցերի մշտական հանձնաժողովի նիստում հավանություն տրվեց կառավարության ներկայացրած «Ազատ տնտեսական գոտիների մասին» ՀՀ օրենքում փոփոխություն կատարելու մասին նախագծին: ՀՀ տնտեսական զարգացման և ներդրումների նախարար Արծվիկ Մինասյանը ներկայացրեց, որ փոփոխվել են շահագործողի մուտքի և ելքի կանոնակարգումը, որպեսզի խնդիրներ չառաջանան, և համապատասխանացրել են ԵԱՏՄ մաքսային օրենսգրքին, մասնավորապես՝ այլ գործունեություն ևս կարող է իրականացվել ազատ տնտեսական գոտում, օրինակ՝ օժանդակ ծառայությունների մատուցում և այլն:
«Ոչ միայն Մեղրին, այլև ամբողջ տարածաշրջանը կարելի է ազատ տնտեսական գոտի հայտարարել»,- նկատեց նախարարը՝ նշելով, որ դինամիկային զուգահեռ՝ այն կընդլայնվի:
Ա.Մինասյանի խոսքով՝ ԱՏԳ-ում գործունեություն ծավալելու համար հայտեր կան Իրանից, Ռուսաստանից, դրանք քննարկման փուլում է. «Մինչև հաջորդ տարվա կեսերը կունենանք 4-5 մասնակիցներ, որ կաշխատեն այդտեղ»:
«Ելքի» պատգամավոր Արամ Սարգսյանը հետաքրքրվեց, թե արդյոք Մեղրիի ԱՏԳ-ում թույլատրվելու է նաև ոսկերչությունն ու ադամանդագործություն. «Բայրամի օրերին չափազանց մեծ առևտուր կլինի»:
Ա.Մինասյանը պատասխանեց, որ չկա սահմանափակում, ցանկացած ոլորտի ընկերություն կարող է այնտեղ գործունեություն ծավալել: Նշելով, որ Երևանում հատուկ ոսկերչության և ադամանդագործության ոլորտի ազատ տնտեսական գոտի է գործում՝ նախարարը համաձայնեց, որ իրանական տոնի կապակցությամբ Մեղրիի ԱՏԳ-ում ոսկեղենի առևտուրը կարող է ավելի խթանվել:
Հանձնաժողովի նախագահ Խոսրով Հարությունյանը գոհունակություն հայտնեց օրինագծի շուրջ կառավարության ծավալած ակտիվ աշխատանքի համար. «Ազատ տնտեսական գոտու զարգացման նոր շունչ, հանգրվան կարող է հանդիսանալ»:
