Արաս Օզբիլիսն այն ֆուտբոլիստներից մեկն է, ով վերադարձրեց հայ երկրպագուների հավատը Հայաստանի հավաքականի նկատմամբ: Նա և խաղընկերներն իրենց տպավորիչ ու արդյունավետ ֆուտբոլի շնորհիվ ցույց տվեցին, որ մենք թիմային մարզաձևում նույնպես կարող ենք զգալի հաջողություններ ունենալ: Ճիշտ է, մեր հավաքականն այդպես էլ ձեռք չի բերել որևէ խոշոր մրցաշարի եզրափակիչ փուլի ուղեգիր, այժմ էլ որոշակի ճգնաժամի մեջ է, Օզբիլիսը շարունակում է սիրելի անձնավորություն մնալ հայկական ֆուտբոլին առնչվող մարդկանց շրջանում:
ArmFootball.com-ը ներկայացնում է 10 փաստեր, որոնք կօգնեն ավելի լավ ճանաչելու թուրքական «Բեշիքթաշում» հանդես եկող ֆուտբոլիստին:
1. Արաս Օզբիլիսը ծնվել է 1990 թվականի մարտի 9-ին, Թուրքիայի Ստամբուլ քաղաքում: Նրա ծնողները հայեր են, իսկ պապերը եղել են Արևմտյան Հայաստանի Տիգրանակերտ քաղաքից, որը հայոց Ցեղասպանությունից հետո անցել է թուրքական տիրապետության:
2. Իրենց գոյությունը Թուրքիայում պահպանելու համար նրա պապերը ստիպված են եղել փոխելու ազգանունը՝ Զբիլիսյանը դարձնելով Օզբիլիս: 1990-ականներին Արասի ընտանիքն այնտեղից տեղափոխվել է Հոլանդիա: 7 տարեկանից սկսել է մարզվել Ամստերդամի «Այաքսի» մանկապատանեկան թիմում:
3. Օզբիլիսն ամստերդամյան լեգենդար ակումբի գլխավոր թիմում հայտնվեց 2010 թվականին՝ նրա հետ կնքելով 2,5 տարվա պայմանագիր: Նա իր մասին խոսեցնել տվեց արդեն երիտասարդական թիմում ելույթների ժամանակ և դրա շնորհիվ ճանաչվեց ակումբի ամենախոստումնալից ֆուտբոլիստ: Առաջին թիմում նորամուտը կարող էր կայանալ Չեմպիոնների լիգայի գավաթի խաղարկությունում՝ Մադրիդի «Ռեալի» դեմ մրցավեճում, բայց Արասն այդպես էլ մնաց պահեստայինների նստարանին:
4. Այդուհանդերձ, երկար սպասված օրը եկավ նոյեմբերի 28-ին, երբ 20-ամյա ֆուտբոլիստը Հոլանդիայի առաջնության «Վենլոյի» դեմ արտագնա խաղում փոխարինեց ֆինն Տեմու Տաինիոյին: Օզբիլիսն իրեն հրաշալի դրսևորեց, իսկ «Այաքսը» հաղթանակ տոնեց 2:0 հաշվով: Առաջնության արդեն հաջորդ խաղում գլխավոր մարզիչ Մարտին Յոլն Արասին տեղ վստահեց մեկնարկային կազմում:
5. Օզբիլիսն «Այաքսի» գլխավոր թիմում անցկացրեց 2 մրցաշրջան: Հոլանդական ակումբում նրա գուցե ամենահիշարժան խաղը կայացավ 2012 թվականի փետրվարի 23-ին, երբ «Այաքսը» Եվրոպայի Լիգայի գավաթի խաղարկությունում «Օլդ Թրաֆորդ» մարզադաշտում հյուրընկալվեց «Մանչեսթեր Յունայթեդին»: Հյուրերը պարտվում էին 0:1 հաշվով, սակայն 37-րդ րոպեին հավասարեցրին հաշիվը՝ շնորհիվ Օզբիլիսի հրաշալի գոլի: Հետագայում նաև հաղթանակ կորզեցին 2:1 հաշվով: Այդ խաղից հետո կային խոսակցություններ, որ Օզբիլիսի խաղը գրավել է «Մանչեսթեր Յունայթեդի» սկաուտների ուշադրությունը:
6. Կրասնոդարի «Կուբանում» մեկ մրցաշրջան անցկացնելուց հետո Հայաստանի հավաքականի ֆուտբոլիստը մինչ 2015 թվականը հանդես է եկել Մոսկվայի «Սպարտակում»: Սկզբնական շրջանում ամեն ինչ հարթ էր ընթանում նրա համար, իսկ հետո եղավ ծանր վնասվածքը, ինչպես նաև գլխավոր մարզչի պաշտոնում ազգությամբ թուրք Յակինի նշանակումը: Ֆուտբոլիստի և մարզչի փոխհարաբերությունները լարված էին, և խաղացողը նախընտրեց հեռանալ Ռուսաստանից:
7. Պայմանագիր կնքելով թուրքական «Բեշիքթաշի» հետ՝ Օզբիլիսը կես տարի վարձավճարով անցկացրեց իսպանական «Ռայո Վալյեկանոյի» կազմում: Այսպիսով, նա դարձավ Հայաստանի հավաքականում հանդես եկած առաջին ֆուտբոլիստը, ով ելույթ է ունեցել Իսպանիայի Լա Լիգայում:
8. Օզբիլիսի հայտնվելը Հայաստանի հավաքականում այդքան էլ սահուն չստացվեց: Խաղացողը ստիպված էր ընտրություն կատարելու իր պատմական հայրենիքի և Հոլանդիայի ընտրանու միջև: 2010 թվականի մայիսին նա արդեն հրավիրվել էր երիտասարդական հավաքականի հավաքին, մարզիչները ծանոթացել էին նրա կարողություններին, բայց կային փաստաթղթային խնդիրներ: Հետագայում՝ երկար մտորումներից հետո, Արասն ընտրեց Հայաստանի ազգային հավաքականը և ստացավ Հանրապետության քաղաքացիություն:
9. 2011 թվականի հոկտեմբերի 4-ին Օզբիլիսը ՀՀ նախագահ Սերժ Սարգսյանի հրամանագրով ստացավ քաղաքացիություն և ընդգրկվեց Հայաստանի հավաքականում: Նորամուտի խաղում մերոնք 2012 թվականի փետրվարի 29-ին ընկերական մրցավեճում մրցեցին Կանադայի ընտրանու հետ: Արասը նորամուտը նշանավորեց խփած գնդակով (3:1):
10. Օզբիլիսը հավաքականի կազմում մինչ օրս 27 հանդիպում է անցկացրել և դարձել 4 գոլի հեղինակ: Առանձնանում են նրա խփած գոլերը Դանիայի և Բուլղարիայի հավաքականների դարպասը: Դրանք պատմական հանդիպումներ էին մեր ընտրանու համար: Օզբիլիսի անհավանական գոլը տուգանային հարվածով սկիզբ դրեց Երևանում բուլղարացիների նկատմամբ 2:1 հաշվով հաղթանակին: Իսկ Կոպենհագենում Արասի հեղինակած ոչ պակաս գեղեցկության գնդակն ապահովեց խոշոր հաշվով հաղթանակ դանիացիների դեմ մրցավեճում՝ 4:0:
Արման ԱԲԵԼՅԱՆ
