Գլոբալիզացիայի եւ տարածաշրջանային համագործակցության վերլուծական կենտրոնի խորհրդի նախագահ, քաղաքագետ Ստեփան Գրիգորյանը կարծում է, որ նրանք, ովքեր ժողովրդի կողքին չկանգնեցին անցած 2 շաբաթների ընթացքում՝ դարձան քաղաքական դիակներ:
«Կային մարդիկ, ովքեր ցանկանում էին, դա այլ պատմություն է: Հարցն այն չէ՝ դու կո՞ղմ ես այն քայլերին, որոնց դիմեցին Սասնա ծռերը, թե՝ ոչ: Դու պետք է ժողովրդի հետ լինեիր»,-լրագրողների հետ հանդիպման ժամանակ ասաց քաղաքագետը:
Անդարադառնալով նախագահի ելույթին՝ նկատեց.
«2 շաբաթ բռնություններ էին գործադրում հայ ժողովրդի նկատմամբ ու նախագահը ներողություն չխնդրեց: Ես շատ զարմացած եմ: Նա ներողություն չխնդրեց Սարի թաղի ժողովրդից, ինքանհրկիզված ՀՀ քաղաքացուց»:
Ստեփան Գրիգորյանը համոզված է՝ Սերժ Սարգսյանը պետք է հանդիպի Ժիրայր Սեֆիլյանին, քանի որ այդպես էին պայմանավորվել.
«Իշխանությունները պետք է կոնկրետ քայլեր կատարեն, ոչ թե խոստումներ տան»,-նշեց քաղաքագետը:
Ինչ վերաբերում է ոստիկաններին, ապա քաղաքագետը նրանց հարցերը լուծելու տարբերակն էլ գիտի.
«Այն ոստիկանները, ովքեր դաժանություն ցուցաբերեցին, մի մասը պետք է պատասխանատվության ենթարկվի, մյուսներին էլ առանց բացառության Արցախ պետք է ուղարկեն՝ առաջնագիծ, քանի որ այսքան դաժանությամբ եթե հայերի են ծեծում, բա որ ձեռքները թուրք ընկնի, ի՞նչ կանեն»,-ասաց նա:
Խոսելով «Սասնա ծռեր»-ի մասին՝ նշեց.
«Հիմա փորձ կարվի վարկաբեկել Սասնա ծռերի քայլերը: Հասարակությանը կոչ եմ անում հետևել, թե ովքեր են մասնակցելու այդ գործին»:
Անի Կարապետյան
