Հունիսի 28-ին ՀՀ արտակարգ իրավիճակների նախարար Ֆելիքս Ցոլակյանի մոտ կազմակերպվել էր քաղաքացիների ընդունելություն:
Այս անգամ քաղաքացիներն առավելապես եկել էին առաջարկներով: Մասնավորապես՝ Ստյոպա Խոյեցյանն առաջարկում էր ստեղծել ջրհեղեղի և սողանքների կասեցմանը նպաստող՝ իր մտահղացած մեքենան, որը կարող է կիրառվել բնապահպանական, գյուղատնտեսական խնդիրներ լուծելու հարցում, նաև՝ հրդեհների ժամանակ:
Հայաստանի կասկադյորների ազգային ասոցիացիայի նախագահ Արմեն Պետրոսյանն առաջարկում էր լայն համագործակցություն ԱԻՆ-ի հետ և պատրաստակամություն՝ առավել վտանգավոր իրավիճակներում օգտագործելու իրենց ասոցիացիայի ներուժը:
Արկադի Զարգարյանը Ֆելիքս Ցոլակյանին ներկայացրեց բազմաֆունկցիոնալ առաջարկություններ, որոնք վերաբերում էին տարբեր գերատեսչությունների գործառույթների:
Նախարարը համակողմանիորեն ծանոթացավ քաղաքացիների բարձրացրած հարցերին, շնորհակալություն հայտնեց սրտացավ վերաբերմունքի և օգտակար լինելու ձգտման համար և խոստացավ փորձագիտական դրական եզրակացությունների պարագայում՝ լուծում տալ բարձրացված հարցերին կամ առաջարկներն ուղարկել ըստ պատկանելիության:
