Պաշտոնապես հայտարարում ենք, որ Քնքշանք մասոնական օթյակը ձեռնպահ է մնում առաջիկա նախագահական ընտրություններին առաջադրված որևէ թեկնածուի սատարումից, իսկ ազատ որմնադիրներն իրենց քաղաքացիական կեցվածքը կարող են դրսևորել իրենց խղճի մտոք: Հայտարարում ենք նաև, որ ազատ որմնադիրներն առհասարակ հակված չեն ոչնչացնել խորհրդանիշներ, հատկապես այնպիսի տիեզերական նշանակության, ինչպիսին Պարույր Հայրիկյանն է:

Օգտվելով առիթից, հայտարարում ենք նաև, որ նախագահի մեկ այլ թեկնածու Անդրիաս Ղուկասյանի գլխարկին հայտնված ազատ որմնադիրների խորհրդանիշը գլխարկի վրա հավանաբար հայտնվել է պատահաբար, ոչ` դավադիր ճանապարհով: Համենայն դեպս, Ա. Ղուկասյանի գլխարկի վրա հայտնված խորհրդանիշը Քնքշանք մասոնական օթյակի մութ ծրագրերի արգասիք չէ:

Տեղեկացնում ենք նաև, որ կապված Սուրբ Պետրոսի գահից Բենեդիկտոս XVI-ի հրաժարականի հետ` Քնքշանք մասոնական օթյակն այժմ զբաղված է ոչ թե ՀՀ նախագահական ընտրությունների խնդիրներով, այլ` առաջիկայում նախատեսված Կոնկլավի կազմակերպչական աշխատանքներով, ուստի Հայաստանի քաղաքացիներին առաջարկում ենք զերծ մնալ ընտրությունների համատեքստում ազատ որմնադիրների անվան շահարկումից:

Հարգանքներով`

Քնքշանք հայկական մասոնական օթյակի մամլո դիվան