Ռուսաստանը պատրաստ է նպաստել ղարաբաղցի հայերի անվտանգ վերադարձին տարածաշրջան, եթե նրանք ցանկանան, ՏԱՍՍ-ին տված հարցազրույցում ասել է ՌԴ փոխարտգործնախարար Միխայիլ Գալուզինը։
«Ցավոք, ղարաբաղցի հայերի մեծ մասը լքել է տարածաշրջանը։ Դա նրանց դժվար, բայց կամավոր ընտրությունն էր։ Այս առումով՝ կարևոր է պայմաններ ստեղծել ցանկացողների վերադարձի համար՝ պատշաճ կերպով ապահովելով նրանց իրավունքները և անվտանգությունը»,- ասել է նա։
«Մենք պատրաստ ենք ամեն հնարավոր օգնություն ցուցաբերել այս գործընթացին, այդ թվում՝ ռուսական խաղաղապահ կոնտինգենտի միջոցով, որի ներկայությունը մեծ նշանակություն ունի»,- ասել է Գալուզինը։
ՌԴ ԱԳՆ ղեկավարի տեղակալի խոսքով՝ «ռուսական ջանքերի շնորհիվ, այդ թվում՝ մեր վեց խաղաղապահների կյանքի գնով, 2023 թվականի սեպտեմբերին ադրբեջանական ագրեսիայի ժամանակ հաջողվել է խուսափել զգալի քաղաքացիական զոհերից»։
«Ռուսական խաղաղապահ կոնտինգենտի ակտիվ միջնորդությամբ 2023 թվականի սեպտեմբերի 20-ին պայմանավորվածություն է ձեռք բերվել դադարեցնել ռազմական գործողությունները և բանակցություններ են վարվել Ղարաբաղի հայ բնակչության ներկայացուցիչների և Ադրբեջանի իշխանությունների միջև։ Մեր խաղաղապահները ապաստան են տրամադրել խաղաղ բնակչությանը, հումանիտար օգնություն են հասցրել և կազմակերպել բժշկական տարհանումներ»,- ասել է Գալուզինը։
Թարմացված․ Մոսկվան Լեռնային Ղարաբաղում ռուս խաղաղապահների ներկայության պայմանները կքննարկի միայն Բաքվի հետ՝ կապված տարածաշրջանում իրավիճակի արմատական փոփոխության հետ, ՏԱՍՍ-ին տված հարցազրույցում ասել է ՌԴ փոխարտգործնախարար Միխայիլ Գալուզինը։
«Հաշվի առնելով Ղարաբաղում իրավիճակի արմատական փոփոխությունը՝ մեր խաղաղապահների մնալու պայմանները քննարկվում են միայն ադրբեջանական կողմի հետ»,- ասել է նա։
Ըստ Գալուզինի՝ Ադրբեջանի հետ երկխոսությունը «կառուցողական» բնույթ ունի։
«Բոլոր հարցերը, որոնք ծագում են, լուծում ենք երկուստեք ընդունելի ձևով։ «Ինչ վերաբերում է 2025 թվականի նոյեմբերից հետո ռուսական խաղաղապահ կոնտինգենտի լիազորությունների ընդլայնմանը, դա կախված կլինի տարածաշրջանում տիրող իրավիճակից, նրանց հետագա ներկայության պահանջից և Բաքվի հետ համապատասխան պայմանավորվածություններից»,- ասել է նա։
Թարմացված․ «Լեռնային Ղարաբաղում 2023 թվականի սեպտեմբերյան իրադարձությունները անտեղի չէին»։ Այս մասին ՏԱՍՍ-ին տված հարցազրույցում հայտարարել է ՌԴ փոփարտգործնախարար Միխայիլ Գալուզինը։
«Հայկական կողմը դեռևս 2022 թվականի հոկտեմբերին Պրահայում ԵՄ հովանու ներքո կայացած գագաթնաժողովում է ճանաչել Ադրբեջանի տարածքային ամբողջականությունը՝ ներառյալ Ղարաբաղը։ Այն ժամանակ չէր լուծվել տարածաշրջանի հայ բնակչության իրավունքների ու անվտանգության ապահովման հարցը», - ասել է Գալուզինը։
«Ռուսական կողմի ջանքերով, այդ թվում՝ վեց խաղաղապահի կյանքի գնով է միայն հնարավոր եղել խուսափել խաղաղ բնակչության շրջանում զգալի զոհերից, և ռուսական խաղաղապահ զորախմբի ակտիվ միջնորդությամբ է 2023 թվականի սեպտեմբերի 20-ին պայմանավորվածություն ձեռք բերվել ռազմական գործողությունների դադարեցման շուրջ, և Ղարաբաղի հայ բնակչության ներկայացուցիչների ու Ադրբեջանի իշխանությունների միջև բանակցություններ են անցկացվել»,-ասել է Գալուզինը։
