2015 թվականի նոյեմբերի 25-ին ԱԱԾ-ի կողմից վնասազերծված զինված խմբի գործով կալանավորված, ՀՀ պաշտպանության նախկին փոխնախարար Վահան Շիրխանյանը դեռևս մայիս ամսից կոնտակտներ է ունեցել խմբի ղեկավարների հետ: Այս մասին լրագրողների հետ հանդիպման ժամանակ ասաց ԱԱԾ քննչական վարչության պետի առաջին տեղակալ, քրեական գործով քննչական խմբի ղեկավար Միքայել Համբարձումյանը:
«Մեր գնահատմամբ՝ նա տեղեկություն է ունեցել խմբի ծրագրերի մասին, դրանից հետո ուրույն դերակատարություն է ստանձնել: Մեր խնդիրն է՝ պարզել, թե Շիրխանյանը գործողություններ կատարել է, թե՝ ոչ»,-նշեց ԱԱԾ քննչական վարչության պետի առաջին տեղակալը:
Քրեական գործով քննչական խմբի ղեկավարն անդրադարձավ նաև Շիրխանյանի առողջությանը վերաբերող տեղեկատվությանը.
«Դրանք չափազանցված են և իրականությանը չեն համապատասխանում: Հետաքրքիրն այն է, որ Վահան Շիրխանյանը երբևէ չի բողոքել իր նկատմամբ անտարբերությունից կամ վատ վերաբերմունքից: Նրա առողջականի մասին մեզ իրազեկել են իր պաշտպանները, որից հետո մենք պատշաճ կերպով տեղեկացրել ենք քրեակատարողական հիմնարկին, որն էլ ապահովել է բժշկական հետազոտումը: Այժմ նշանակել ենք դատաբժշկական փորձաքննություն և սպասում ենք եզրակացությանը»:
Հիշեցնենք, որ Վահան Շիրխանյանը կալանավորվել է 2015թ. դեկտեմբերի 21-ին. նա մեղադրվում է Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն և դերակատարություն ունենալու մեջ, նախատեսված`ՀՀ քրեական օրենսգրքի 223-րդ հոդվածի 2-րդ մասով:
Անի Կարապետյան
