Ազգային ժողովի տնտեսական հարցերի մշտական հանձնաժողովի նախագահ, «Իմ քայլը» խմբակցության պատգամավոր Բաբկեն Թունյանը ֆեյսբուքի էջում հրապարակել է ՀՀ-ում գրանցված գնաճի մասին տեղեկատվություն:

Ըստ հրապարակման՝ վիճակագրական կոմիտեի տվյալներով՝ 2020 թվականի հունվարին 12-ամսյա գնաճը Հայաստանում (2019-ի հունվարի համեմատ) կազմել է 0.2%: «Այդ թվում՝ սննդամթերքի եւ ոչ ալկոհոլային խմիչքների ապրանքախմբի գծով արձանագրվել է 1.8% գնանկում:

Հիշեցնեմ, որ այս տարվա հունվարի 1-ից ուժի մեջ են մտել ԵԱՏՄ բարձր մաքսատուրքերը մի քանի հարյուր ապրանքատեսակների (հիմնականում՝ սննդամթերք) գծով։ Այսպիսով, վիճակագրությունը փաստում է, որ, ի հեճուկս չարագուշակ կանխատեսումների, սննդամթերքի գծով ոչ միայն «սարսափելի գնաճ» չի գրանցվել, այլ հակառակը՝ գներն ընդհանուր առմամբ նվազել են նախորդ տարվա հունվարի համեմատ»,- գրել է Թունյանն ու հղում արել Վիճակագրական կոմիտեի պաշտոնական կայքին։