Ավելի վաղ տեղեկացրել էինք, որ ԵԱՀԿ Մինսկի խմբի ամերիկացի համանախագահ Ջեյմս ՈՒորլիքը Twitter-ի իր միկրոբլոգում գրառում էր արել՝ մասնավորապես նշելով.
«Մենք նույնպես հիշում ենք Սումգայիթը: Հայաստանն ու Ադրբեջանը պետք է աջակցեն հասարակությունների միջև շփման ծրագրերին՝ հանդուրժողականության ու վստահության մթնոլորտին նպաստելու համար»:
Ուորլիքի այս հայտարարությունը Բաքվում հիստերիայի հերթական ալիքի պատճառ է դարձել:
«Սումգայիթյան իրադարձությունները տեղի են ունեցել, բայց դրանց պատճառները, կոնտեքստը և իրականությունը բոլորովին այլ են»,- արձագանքելով Ուորլիքի հայտարարությանն, ասել է Ադրբեջանի ՆԳ փոխնախարար Արազ Ազիմովը:
Նա ասել է, որ Ուորլիքը խոսել էր նաև Խոջալուի մասին՝ նշելով, որ Twitter-ը Խոջալուի մասին քննարկման հարթակ չէ:
«Ես չեմ կարող այս ամենի մասին ասել պարոն Ուորլիքին, քանի որ twitter-ում կարելի է առավելագույնը 120 տառ գրել: Պարոն Ուորլիքը վերջերս է նշանակվել իր պաշտոնում և պետք է ավելի լավ ծանոթանա հակամարտության պատմությանը»,- ասել է Ազիմովը:
