ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնում քննվող քրեական գործով միջոցներ են ձեռնարկվում՝ պարզելու մի խումբ անձանց կողմից նախնական համաձայնությամբ խոշոր չափերով առերեւույթ գողության դեպքի հանգամանքները: Այս մասին տեղեկացնում է ՀՀ քննչական կոմիտեի տեղեկատվության եւ հասարակայնության հետ կապերի բաժին
Նախնական տվյալներով` 2019թ. սեպտեմբերի 7-ին, ՀՀ ոստիկանության Կենտրոնական բաժնում Երեւանի բնակիչը հաղորդում է տվել այն մասին, որ նույն օրը` ժամը 04:58-ի սահմաններում, անհայտ անձինք գաղտնի հափշտակել են Երեւան քաղաքի Զաքյան փողոցում կայանված իր մեքենայի զույգ հեռարձակները` պատճառելով խոշոր չափերի գույքային վնաս:
Դեպքի առթիվ՝ ՀՀ ոստիկանության Երեւան քաղաքի վարչության Կենտրոնականի բաժնում հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-ին մասի 1-ին եւ 2-րդ կետերով եւ ուղարկվել ՀՀ ՔԿ ԵՔՔՎ Կենտրոն եւ Նորք-Մարաշ վարչական շրջանների քննչական բաժին՝ նախաքննություն կատարելու համար:
Նախաքննության ընթացքում ստացվել են դեպքի վայրի անվտանգության տեսախցիկների տեսագրությունները, ենթարկվել զննության, որտեղ երեւում են առերեւույթ հանցագործություն կատարած անձինք:
Քրեական գործով բազմակողմանի, օբյեկտիվ եւ լրիվ քննությունն ապահովելու նպատակով միջոցներ են ձեռնարկվում՝ առերեւույթ հանցանքը կատարած անձանց հայտնաբերելու ուղղությամբ:
Նշված անձանց Քննչական կոմիտեն խնդրում է ներկայանալ վարույթն իրականացնող մարմնին կամ ովքեր ճանաչում են նրանց, որեւէ տեղեկություն ունեն նրանց ինքնության կամ գտնվելու վայրի մասին, հայտնեն ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանի քննչական բաժին:
