ՀՀ փոխվարչապետի պաշտոնակատար, «Իմ քայլը» դաշինքի ռեյտինգային թեկնածու Տիգրան Ավինյանի նախընտրական շտաբի պետ Վարագ Սիսեռյանը ֆեյսբուքյան իր էջում անդրադարձել է մամուլի այն հրապարակումներին, որ Տիգրան Ավինյանը համագործակցում է նախկին իշխանության ներկայացուցիչների հետ:
Վարագ Սիսեռյանի գրառումն ամբողջությամբ ներկայացնում ենք ստորև.
«Սիրելի՛ ընկերներ,
«Հրապարակ» թերթը հոդված է հրապարակել, որտեղ գրում է, թե «ՀՀԿ երբեմնի տասովշչիկներն աջակցում են Տիգրան Ավինյանին»:
Այս առումով նշեմ հետևյալը.
• Առաջին, որևէ «տասովշչիկներ» մեզ չեն աջակցում։
• Երկրորդ, Տիգրան Ավինյանը պարբերաբար իր նախընտրական շտաբերում հանդիպումներ է անցկացնում քաղաքացիների հետ, և մուտքը դրանց ընթացքում ամբողջովին ազատ է։ Մեր դռները բաց են բոլորի առջև, և յուրաքանչյուր ոք կարող է մոտենալ և ծանոթանալ «Իմ քայլը» դաշինքի ծրագրային դրույթներին, Հայաստանի զարգացման մեր տեսլականին։
• Երրորդ, նախընտրական քարոզչության աշխատանքների շրջանակներում մենք ներգրավվել ենք կամավորների, որոնք մեզ օգնում են բուկլետներ բաժանելու, պաստառներ փակցնելու և այլ կազմակերպչական հարցերում։
Բնականաբար, չենք կարող յուրաքանչյուր օգնել ցանկացող կամավորի կենսագրությունը մանրադիտակի տակ դնել ու ստուգել և մտնել նրա կյանքի մանրամասնությունների մեջ։ Բայց մինչև որևէ անձի մեր աշխատանքներում ներգրավելը մենք հստակորեն բացատրում ենք նրան, թե որոնք են օրենսդրությամբ նախատեսված խաղի կանոնները և պահանջում, որպեսզի նրանք առաջնորդվեն միայն դրանցով։
Թերևս այսքանը»:
