ՊԵԿ նախաբացթողումային հսկողության վարչության աշխատակիցները թմրանյութի ապօրինի տեղափոխման աննախադեպ դեպք են հայտնաբերել

Պետական եկամուտների կոմիտեի նախաբացթողումային հսկողության վարչության աշխատակիցները թմրանյութի ապօրինի տեղափոխման խոշոր դեպք են բացահայտել, ինչն, ըստ  ՊԵԿ նախաբացթողումային հսկողության վարչության պետ Վահրամ Գուրողլյանի, աննախադեպ է այս տարվա ընթացքում. «Օրերս հայտնաբերել ենք թմրանյութի ապօրինի տեղափոխման 2013 թվականի ընթացքում ամենախոշոր խմբաքանակը: Իրացնելով օպերատիվ տվյալները` «Զվարթնոց»  օդանավակայանի բեռնային համալիրում կանխվել է շուրջ 8կգ թմրանյութի արտահանման փորձ: Իրանի մի քաղաքացի, փոստային ծանրոցի միջոցով փորձ է կատարել ավելի քան 5,5կգ թմրանյութ ուղարկել Կանադա: Ունենալով կասկածներ դեպքի շարունակելի լինելու վերաբերյալ` մի քանի օր անց, Ազգային անվտանգության  ծառայության աշխատակիցների հետ համատեղ կանխեցինք նույն քաղաքացու կողմից  ևս 3կգ թմրանյութի արտահանման փորձը»:

Շուրջ 8կգ թմրանյութի առգրավման այս դեպքն  աննախադեպ է 2013-ի ընթացքում: Նշենք, որ ուղիղ 2 տարի առաջ էլ վարչության կողմից ավելի քան 11 կիլոգրամ թմրանյութի ներկրման փորձ էր կանխվել Մեղրիի մաքսակետում, ինչն, ի դեպ, Վահրամ Գուրողլյանի խոսքերով, դեռևս աննախադեպ քանակ է մնում մաքսային ծառայության ամբողջ պրակտիկայի ընթացքում: Գաղտնիք չէ, որ հանցավոր մտադրություններն իրականացնելու համար մաքսանենգները դիմում են բազմաթիվ հնարքների: Օրինակ, վերջերս վարչությունը սնդիկի ապօրինի ներկրման բավականին ուշագրավ դեպք է արձանագրել Մեղրիի մաքսակետում: Իրանի մի քաղաքացի, փորձելով շրջանցել մաքսային հսկողությունը, շուրջ 570 գրամ սնդիկը նետել էր աղբամանի մեջ` հուսալով, որ աննկատ կմնա և աղբահանությունից հետո կվերցնի այն: Սակայն մաքսանենգության փորձը հաջողվել է հայտնաբերել ԱԱԾ-ի հետ համատեղ իրականացված միջոցառումների արդյունքում:

                Տարեցտարի բարձրանում է մաքսային օրինախախտումների բացահայտման մակարդակը: Նախաբացթողումային հսկողության վարչությունը տարին ավարտում է բավականին խոսուն ցուցանիշներով: «Վարչության կողմից կատարված որակական աշխատանքների մասին է վկայում նաև այն, որ 2013 թվականի ընթացքում ՆՀՎ աշխատակիցները հայտնաբերել են մաքսային կանոնների խախտման շուրջ 100 դեպք: Տեխնիկական վերազինման շնորհիվ, տարեցտարի բարձրանում է մաքսային օրինախախտումների բացահայտման մակարդակը, ինչը նաև հետևողական հսկողության արդյունք է»,-ընդգծել է նախաբացթողումային հսկողության վարչության պետ Վահրամ Գուրողլյանը:

            ՊԵԿ տեղեկատվության և հասարակայնության հետ կապերի բաժին