Նոյեմբերի 20-ին ԱՄՆ-ում մահացած երգչուհի Ֆլորա Մարտիրոսյանի աճյունը մինչեւ շաբաթվա վերջ անպայման կտեղափոխեն Հայաստան:
Այս մասին գրում է news.am-ը `հղում անելով Ֆլորա Մարտիրոսյանի անձնական օպերատոր Արթուր Հովհաննիսյանին, ով սակայն Այլ մանրամասների չէր տիրապետում:
news.am-ը նաև գրում է, որ փորձել է մանրամասներ ճշտել Ֆլորա Մարտիրոսյանի` ԱՄՆ-ում բնակվող քրոջ որդուց` Մանուկից: Նա ասել է, որ դեռեւս հայտնի չէ աճյունը Հայաստան տեղափոխելու օրը, այժմ զբաղված են ամերիկյան թղթաբանությամբ:
Ֆլորա Մարտիրոսյանի հոգեհանգստի արարողությունը տեղի կունենա Լոս Անջելեսում, սակայն օրը դեռեւս հայտնի չէ: Հայտնի երգչուհու հուղարկավորությունը կկայանա Հայաստանում: Այստեղ կորոշեն, թե որտեղ կհուղարկավորեն հայտնի երգչուհուն` Կոմիտասի անվան պանթեոնում, թե՝ քաղաքային պանթեոնում:
Մանուկը նշել է, որ Ֆլորա Մարտիրոսյանի հարազատները բժիշկների, հիվանդանոցի դեմ դատական գործ սկսելու մտադրություն չունեն: Նա հաստատել է լրատվամիջոցներում տարածված տեղեկությունները, թե վատացել է սիրված երգչուհու ամուսնու` Հրահատ Գեւորգյանի առողջական վիճակը: Նախկինում եւս նա առողջական խնդիրներ ուներ, սակայն այժմ դրանք սրվել են:
Հայաստանի ժողովրդական արտիստուհի, հայտնի երգչուհի Ֆլորա Մարտիրոսյանը մահացել է նոյեմբերի 20-ին, ԱՄՆ-ում։ Նա 55 տարեկան էր:
