Կրակոցներ Երևանում՝ Հրազդանի կիրճում հայտնի «Ամառ» ռեստորանային համալիրի մոտ․ ոստիկանների օպերատիվ գործողությունների արդյունքում կասկածյալները, որոնցից մեկը Վայոց ձորի մարզպետ Վահագն Արսենյանի եղբոր տղան է, չհասցրեցին ճողոպրել
Այս մասին հայտնում է ֆոտոլրագրող Գագիկ Շամշյանը։
Ֆոտոլրագրողի տեղեկություններով բերման են ենթարկվել Երևանի բնակիչ 22-ամյա Յուրիկ Բադալյանը և Վայոց ձորի մարզի բնակիչ 20-ամյա Աշոտ Արսենյանը։
Շամշյանը հայտնում է, որ բերման ենթարկվածներից Ա. Արսենյանը Վայոց ձորի մարզպետ Վահագն Արսենյանի եղբոր տղան է։
***
Ըստ պաշտոնական հաղորդագրության՝
Ոստիկանության գվարդիայի ծառայողները ձերբակալել են խուլիգանություն կատարած երիտասարդներին
Սեպտեմբերի 26-ին՝ ժամը 2.13-ին, ՆԳՆ օպերատիվ կառավարման կենտրոն հաղորդում է ստացվել, որ Ձորափի փողոցի ռեստորաններից մեկի մոտ գազային ատրճանակից օդ են կրակել։
ՆԳՆ ոստիկանության գվարդիայի ծառայողների ձեռնարկած միջոցառումների արդյունքում պարզվել է, որ ժամը 1.47-ի սահմաններում «Յագուար» մակնիշի ավտոմեքենայից գազային ատրճանակից կրակոց են արձակել Երևանի բնակիչ 22-ամյա և Վայոց ձորի մարզի բնակիչ 19-ամյա երիտասարդներ։
Երիտասարդները տեղում հայտնաբերվել, խուլիգանություն կատարելու անմիջականորեն ծագած հիմնավոր կասկածով ձերբակալվել և տեղափոխվել են Համայնքային ոստիկանության Կենտրոնական բաժին։
