Այսօր` փետրվարի 19-ին, լրանում է հայ մեծանուն բանաստեղծ Հովհաննես Թումանյանի 146- ամյակը: Այս օրը նշվում է նաև միմյանց գիրք նվիրելու օրը: Օրվա հետ կապված՝ հետաքրքիր նախաձեռնությամբ հանդես եկավ ԿԳ նախարար Արմեն Աշոտյանը: Նա նախարարություն հրավիրեց բոլոր նրանց, ովքեր ցանկանում էին իրեն գիրք նվիրել ու ստանալ: Ներկաների թիվը փոքր-ինչ զարմացրեց նախարարին, քանի որ սպասվածից շատ էին:
Ավելին, երկար-բարակ ճանպարհ էր կտրել-անցել ու Ագարակից դեպի Երևան շտապել տեղի Թերլեմեզյանի անվան միջնակարգ դպրոցի 7-րդ դասարանի աշակերտ Սարգիս Մելքոնյանը, ով նախաձեռնության մասին տեղեկացել էր ֆեյսբուքից.
«Տեսա նախարարի գրառումը, որոշեցի գալ ու նրան նվիրել հարազատ գյուղիս մասին պատմող գիրքն ու իմ հեղինակած բանաստեղծությունների ժողովածուն»,-Asekose.am-ի թղթակցի հետ զրույցում ասաց Սարգիսը:
Պատանու խոսքով՝ իր կարդացած վերջին գիրքը Դանիել Դեֆոյի «Ռոբինզոն Կրուզոն» է, իսկ այսօր ստացած առաջին նվերը «Անտարես»-ի կողմից Դոստոևսկու «Ապուշը»-ն է եղել:
Նշենք, որ Արմեն Աշոտյանը ներկաներին նվիրեց իր բանաստեղծությունների «Голос» ժողովածուն:
Անի Կարապետյան
