«Փաստինֆո»-ին որոշ մանրամասներ են հայտնի դարձել նախօրեին Էջմիածնի քաղաքապետ Կարեն Գրիգորյանի Լեքսուս մակնիշի ավտոմեքենայի ուղղությամբ արձակված կրակոցների դեպքի և դրան հաջորդած իրադարձությունների մասին:
Այսպես, մեր տեղեկություններով, ավտոմեքենայի սրահից Էջմիածնի քաղաքապետի թեկնածու Արթուր Թումանյանը իր մոտ գտնվող ատրճանակով կրակ է արձակել Էջմիածնի քաղաքապետ Կարեն Գրիգորյանի կողմից վարվող Լեքսուս մակնիշի ավտոմեքենայի ուղղությամբ, որից հետո դիմել է փախուստի:
Քաղաքապետի եղբայրը իր կողմից վարվող «Տոյոտա քեմրի» մակնիշի ավտոմեքենայով միացել է եղբորը և հետապնդել Ա.Թումանյանին : Էջմիածին քաղաքում իրենց կողմից վարվող ավտոմեքենաներով հարվածել են Թումանյանի վազ 21-06 մակնիշի ավտոմեքենային, որի արդյունքում այն կանգնել է, իջել են մեքենաներից, սկսվել է քաշքշուկ: Այդ ժամանակ իրենք Ա. Թումանյանի ձեռքից խլել են ատրճանակը, որով նա կրակել է իրենց ուղղությամբ:
«Փաստինֆո»-ն ավելի վաղ տեղեկացրել էր, որ լարված իրավիճակ է Էջմիածնում. նախօրեին կրակել են գործող քաղաքապետ Կարեն Գրիգորյանի մեքենայի ուղղությամբ, ծեծել մրցակից թեկնածուին:
Դեպքը տեղի է ունեցել ուշ երեկոյան` ժամը 23։00-ի սահմաններում, երբ Էջմիածնի գործող քաղաքապետ Կարեն Գրիգորյանն իր ավտոմեքենայով Երևանից վերադառնալիս է եղել Էջմիածին, Զվարթնոցի ճանապարհի մոտակայքում Վազ 2106 մակնիշի ավտոմեքենայի վարորդը դուրս է եկել հանդիպակաց երթևեկելի գոտի, որից հետո ավտոմեքենայի միջից կրակոցներ են հնչել Կ. Գրիգորյանի ավտոմեքենայի ուղղությամբ։
Բարեբախտաբար զոհեր չկան: Փոխարենը հիվանդանոցում է հայտնվել մրցակից թեկնածուն` ծեծված: Վերջինիս վիճակը ծանր է, սակայն կյանքին վտանգ չի սպառնում:
Նշենք, որ այստեղ քաղաքապետի պաշտոնի համար թեժ պայքար է ընթանում գործող քաղաքապետ Կարեն Գրիգորյանի և թեկնածու Արթուր Թումանյանի միջև: