Արդեն երկրորդ տարին է, ինչ Ազգային առաջնորդության ինստիտուտի, ամերիկյան Inside Out Global-ի և Հայ Առաքելական Եկեղեցու Շիրակի թեմի «Երիտասարդական Կազմակերպության» համագործակցության արդյունքում Գյումրիում կազմակերպվում է ֆիլմ-ճամբար: Ծրագրին մասնակցում են նախապես ընտրված 17-ից 20 տարեկան 13 երիտասարդներ:
 Հայաստանյան թիմը ԱՄՆ-ից ժամանած մասնագետների հետ մասնակիցներին 8 օրվա մեջ սովորեցնելու են նկարահանել ֆիլմ: Ընտրված է հետաքրքիր մեթոդ ուսուցողական և պրակտիկ աշխատանքներն իրականցնելու համար:
Այս պահին երիտասարդներից կազմված է երկու խումբ, որոնք աշխատում են որպես յուրաքանչյուրն առանձին կինոարտադրող կառույց: Թիմում երիտասարդները հանդես են գալիս, որպես ռեժիսոր, սցենարիստ, պրոդյուսեր, օպերատոր և այլն… Յուրաքանչյուր թիմ ունի իր ղեկվարները, որոնք ուղղորդում, սովորեցնում և մասնագիտական օգնություն են ցուցաբերում թիմի կրտսեր անդամներին: Բացի թիմի ղեկավարներից դասընթացներ են անցկացնում նաև արտերկրից ժամանած մասնագետները:  Նրանք սովորում և իրենց սովորածը կիրառում են գործնականում:
Այս օրերի ընթացքում ճամաբարականները հասցրել են ծանոթանալ գրական և ռեժիսորական սցենարի, լույսի ու օպերատորական աշխատանքի, հնչունայաին և մոնտաժայաի մասի հետ: Երկու թիմերն էլ արդեն նկարահանել են 30 վայրկյան տևողությամբ սոցիալական գովազդները, իսկ այժմ խաղարկային կարճամետրաժ ֆիլմի սցենարները գրեթե պատրաստ են և երիտասարդները սովորելուն ուգահեռ ձեռնամուխ են լինում իրենց մտահղացումը թղթից էկրան տեղափոխեու: Ճամբարականները խոստովանում են, որ ոգևորված են և անկախ գրաֆիկի զբաղվածությանը իրենց թե դասերը, թե պրակտիկ ուսումնական պրոցեսները դուր են գալիս և անընդհատ նոր բաներ են սովորում ու բացահայտում:

Ֆիլմ-ճամբարն իր գործունեությունը կավարտի հուլիսի 10-ին և արդեն իսկ նկարահանված ֆիլմերը Գյումրիի «Հոկտեմբերյան» կինոթատրոնից կներկայացվի հանդիսատեսին: Երիտասարդներն ուրախ կլինեն, իրենց ֆիլմերի պրեմիերային դահլիճում շատ հյուրեր տեսնել, սիրով հրավիրում են բոլորին:

 


                                                                                                            Հեղինակ`

Ջուլիետա Տոնականյան