Քաղաքագետ Հայկ Մարտիրոսյանի ֆեյսբուքյան գրառումը․ «Հայը հայ է ամենուր:
Հալեպի ու Դամասկոսի հայերն էլ հայավարի «լավ կըլնի» ասելով մնացին Սիրիայում: Ու հայավարի ոչ մի կողմ չբռնեցին: Կառավարության կողմից էլ չկռվեցին, չփորձեցին իրենք էլ գոնե անկախ ուժ դառնալ:
Ճիշտ Լիբանանի հայերի պես, որ քաղաքացիական պատերազմի տարիներին հայավարի չեզոքություն հայտարարեցին, իրենց փնթի թաղերը միայն սկսեցին պաշտպանել և հսկայական կորուստներ կրեցին համայնքի կշռի և անգամ թվաքանակի առումով:
Հալեպահայերը հայավարի էլի հույսը դրեցին այլոց վրա ու նրա, որ իրենց գործը մեկ այլ մեկը պիտի աներ:
Հիմա այլևս հայ համայնքը Սիրիայում ոչ մի հեռանկար չունի: Նոր Սիրիայում հայերն առաջնային թիրախ են լինելու: Թուրքիան ջնջելու է հայկական տարրը իսլամիստական Սիրիայից: Ոչ թե կամ ոչ միայն սրով, այլ ճնշումներով և փաստացի արտաքսումներով: Մի երկու հոգու էլ կuպանեն տեղի սատրապական իսլամիստները և համայնքը ճողոպրելու միջոցներ կփնտրի, միայն թե փրկվի:
Իսկ հսկայական կարողությունն ու մշակութային հայկական գանձե՞րը: Դրանք էլ պատերազմից հետո չեն հանվել Սիրիայից: Ու հիմա Արցախի գանձերի պես ժապավենը վրան մատուցվելու է թուրքերին: Էլի հայերին շատ բնորոշ ձևով: Ապագան վատը չի կարող լինել, ամեն բան լավ է լինելու: Ոչ մի աղետի պատրաստվելու ոչ մի կարիք չկա:
Այնպես չէ, որ քրդերն էլ առանձնակի փաղաքշանքով են մոտենալու հայերին:
Հալեպի հայերը հիմա փաստացի գերի են: Դամասկոսինները շուտով կզգան, թե ինչ է նշանակում Թուրքիայի տիրապետության տակ հայտնվել, երբ քեզ իշխում են իսլամիստ ծայրահեղականները:
Եվ այդպես մի մասը կգա Հայաստան ու կերազի Ամերիկա, Կանադա և Ավստրալիա քոչելու մասին: Որտեղ տասը տարուց իրենց զավակները, էլի հայավարի, արագ, շատ արագ կձուլվեն-կգնան:
Թե ինչ է լինելու այսպիսի տարրի հետ նրա բնօրրանում շուտով` շատ հեշտ է պատկերացնելը:
Եթե, իհարկե, բացառիկորեն ուղեղ ունես: Մի բան, որ նույնպես ծայրահեղ մեծ բացառություն է այլևս այս աշխարհում»։

***

Փաստաբան Սերգեյ Հարությունյանի ֆեյսբուքյան գրառումը․ «Թուրքիայի թեթև ձեռամբ և արևմուտքի հանցավոր աջակցությամբ` 21-րդ դարում փորձում են համաշխարհային բեմից հեռացնել Սիրիա պետությունը, վա՜յ մեր ժողովրդի այն հատվածին, որ չի գիտակցում, որ նույն վտանգը մեր պետությանն է սպառնում, հազա՛ր վայեր...»։

Թյուրքագետ Վարուժան Գեղամյանի ֆեյսբուքյան գրառումը․ «Ըստ ամերիկյան New York Times պարբերականի անանուն աղբյուրների՝ Իրանը սկսել է Սիրիայից դուրս բերել իր հրամանատարներին և զինվորական անձնակազմը, քանի որ այլևս հնարավոր չի համարում պահպանել նախագահ Ասադի իշխանությունը։

Միաժամանակ, ըստ առկա տեղեկությունների, երեկ Իրաքում հանդիպել են Իրանի, Իրաքի և Սիրիայի ներկայացուցիչները՝ քննարկելու պրոթուրքական ուժերին Սիրիայում դիմադրելու հնարավորությունները։ Որոշ արտահոսքեր պնդում են, որ Իրաքը հրաժարվել է զինված օժանդակություն ցուցաբերել Սիրիային։

Եթե այս ամենը ճիշտ է, ապա մի քանի օրից աշխարհի քարտեզի վրա փաստացի կդադարի գոյություն ունենալ Սիրիա անունով հայտնի պետությունը։

Իսկ այս ամենի գլխավոր շահառուն Թուրքիան է, որը փաստացի վերահսկողություն է ստանալու առնվազն երկրի հարուստ հյուսիսի նկատմամբ։ Այդ մասին երեկ խոսել է նաև Թուրքիայի նախագահ Էրդողանը. «Իդլիբ, Համա, Հոմս և թիրախը, իհարկե, Դամասկոսն է։ Հուսով ենք, որ Սիրիայում այս երթը կշարունակվի առանց միջադեպերի և անախորժությունների»։

Թուրքական քաղաքականության հետևողականությունը, համառությունը տարածաշրջանում ոչ մեկ չունի։ Սա պետք է արձանագրել ևս մեկ անգամ»։

***

«ՀայաՔվե» քաղաքացիական ժողովրդավարական նախաձեռնությունը հայտնում է․ «Թրամփի ընտրություններից հետո, և նույնիսկ դրանից առաջ, ՌԴ և Թուրքիայի հարաբերությունները սկսել են սրվել՝
* ՌԴ և Թուրքիայի միջև առևտուրը սկսել է նվազել, քանի որ Թուրքիան սահմանափակումներ է մտցրել երկակի նշանակության ապրանքների տրանզիտային առևտրում։
* Թուրքիան շարունակում է սպառազինություն մատակարարել Ուկրաինա, որը ՌԴ դժգոհությունն է հարուցում։
* Ավարտին է մոտենում Բայրաքթարների հավաքման արտադրության շահագործման հանձնումը Ուկրաինայում, որը հիմա ՌԴ համար դառնում է լեգիտիմ թիրախ։
* Նախկին հացահատիկային գործարքը չի գործում։
* 1.5 տարի Պուտինի և Էրդողանի միջև հանդիպում չի եղել, նույնիսկ Էրդողանի` Կազան այցի ժամանակ, որտեղ նա սառը ընդունելության արժանացավ։
* Աբխազիայում հակառուսական բողոքների հետևում նաև թուրքական ազդեցություն էր կանգնած, նպատակն էր թույլ չտալ, որպեսզի ռուսական կապիտալը գրավի աբխազական ծովափն այնպես, ինչպես թուրքականն արել է Բաթումի ծովափում։
* ՌԴ տարածքում հետապնդումներ են սկսվել պրոթուրքական գործիչների դեմ, լրտեսներ են ձերբակալվել, ՌԴ-ն գիտակցում է, որ թուրքերը շատ ակտիվ առաջ են տանում իրենց պրոթուրանական օրակարգը, ներառյալ ՌԴ տարածքում, և սկսել են հակազդել դրան»։