ԱԻՄ առաջնորդ Պարույր Հայրիկյանի կարծիքով՝ կունենանք խաբեբա, Աստծո 10 պատվիրաններից մեկը մշտապես խախտող վարչապետ, եթե Սերժ Սարգսյանը ստանձնի այդ պաշտոնը:
«Կարո՞ղ է մեկը մի տան մեջ ապրել, որտեղ ասում են, որ այսօր լավ է լինելու, բայց վատ է լինում: Մարդն ի՞նչ ասում է՝ դրա հակառակը պետք է սպասենք: Ասել էր, որ ոչ վարչապետ, ոչ նախագահ չի դառնալու, հիմա, եթե ՀՀԿ-ն իրեն պարտադրում է, փաստացի ասում է՝ պաշտոնապես դարձի՛ր խաբեբա: Թող ճակատին գրեն՝ խաբեբա: ՀՀԿ-ականները, եթե պարտադրում են, ապա Սերժ Սարգսյանի թշնամիներն են: Հիմա, Հայաստանի քաղաքացի, արի՛ ու ապրի՛ր իր խոսքը ուրացող երկրի ղեկավարի առաջնորդությամբ»,-լրագրողների հետ հանդիպման ժամանակ ասաց Պարույր Հայրիկյանը:
Ինչ վերաբերվում է այսօր՝ Ազատության հրապարակում կայանալիք հանրահավաքին՝ ԱԻՄ առաջնորդն ասաց, որ քաղաքացին պետք է լինի երկրի տերը, կարևոր է մարդկանց համախմբվածությունը:
«Կարևորը ռազմավարական նպատակի հստակեցումն է, սահմանադրական իրական բարեփոխումը, որը սպասվում է համատեղ պայքարի հաջող ընթացքի դեպքում: Կվերանան և՛ կեղծ ընտրությունները, և՛ կեղծ Սահմանադրությունը»:
Անի Կարապետյան
