«Վարչապետի պաշտոնից Սերժ Սարգսյանի հրաժարականից հետո մենք ՀՀԿ գործադիր մարմնի կամ խորհրդի նիստ չենք գումարել, որ նման հարց քննարկենք։ Բնականաբար, եթե գումարվի, պետք է քննարկվեն տարբեր հարցեր։ Դա մենք կքննարկենք գործադիրի նիստում, երբ գումարենք այն»,- 168.am-ի հետ զրույցում հայտարարել է ՀՀԿ խմբակցության ղեկավար Վահրամ Բաղդասարյանը՝ պատասխանելով հարցին, թե կուսակցության նախագահի պաշտոնից Սերժ Սարգսյանի հրաժարականի հարց քննարկվե՞լ է ՀՀԿ-ում։ Նա նշել է, որ այդ հարցն ինքը չի քննարկել նաև Սերժ Սարգսյանի հետ և չգիտի նրա տրամադրվածությունը. «Նիստի ժամանակ մենք կլսենք իր կարծիքը, սակայն նա կառչած չէ որևէ բանից։ Ես չեմ կարող նրա փոխարեն պատասխան տալ, բայց իրավիճակից ելնելով կարող է կայացնի իր որոշումը և մենք իր որոշումը քննարկման առարկա կդարձնենք»։ Սակայն, ըստ Վ.Բաղդասարյանի, վարչապետի պաշտոնից հրաժարումը մեխանիկորեն չի նշանակում նաև կուսակցության նախագահի պաշտոնից հրաժարում, մեկը մյուսի հետ կապ չունի։ Թե ե՞րբ է լինելու ՀՀԿ ԳՄ նիստը, Վ.Բաղդասարյանը պատասխանել է, որ դեռ որոշված չէ, բայց չի ուշանա։
Մանրամասները՝ սկզբնաղբյուր կայքում
