Այսօր, ժամը 9։00-ի դրությամբ Երևանի հիվանդանոցներում շարունակում է բուժօգնություն ստանալ հանրահավաքի ընթացքում երեկ տուժած 12 քաղաքացի։ Այդ մասին տեղեկացնում է Առողջապահության նախարարությունը։

Ըստ հաղորդագրության, երեկ վիրահատված ոստիկանի վիճակը գնահատվում է կայուն։ Մյուսների վիճակը մասնագետները գնահատում են բավարար։

Նախարարությունը նշում է, որ նրանց մոտ հիմնականում առկա են ստորին վերջույթների մակերեսային վնասվածքներ։ Բոլորն անցել են անհրաժեշտ լաբորատոր և գործիքային հետազոտություններ, ստանում են համապատասխան բուժում։

Երեկ Ազգային ժողովի շենքի մատույցներում տեղի էր ունեցել ընդհարում՝ ցուցարարների և ոստիկանների միջև: