«Հարմոնիա» հոգեբանության հանրային զարգացման կենտրոնը, կանանց միամսյակի կապակցությամբ կազմակերպել էր սեմինար-թրեյնինգների շարք հատուկ կանանց և աղջիկների համար:
Մարտի 20-ին՝ տեղի ունեցավ հանդիպումների շարքից երկրորդը՝ «Մարմնի լեզուն որպես անձի բացահայտման միջոց» թեմայի շրջանակներում։
Բացման խոսքով հանդես եկավ «Հարմոնիա» հոգեբանության հանրային զարգացման կենտրոնի տնօրեն և օրվա բանախոս Աշխեն Մկոյանը։ Նա նախ ողջունեց, ապա նաև շնորհավորեց մասնակիցներին կանանց միամսյակի կապակցությամբ․
-Ուզում եմ միանալ բոլոր շնորհավորանքներին ու մաղթանքներին, որ այս ընթացքում ստացել եք և ինքս էլ ցանկանալ Ձեզ ներդաշնակություն։ Միշտ եղեք ներդաշնակ,աչքերի փայլը երբեք չկորցնենք և կյանքին միշտ սիրահարված եղեք, -ասաց Աշխենը։
Այնուհետև նա ներկայացրեց օրվա թեման և ընտրությունը կարևորեց նրանով, որ ոչ միայն աղջիկների, այլ բոլորի համար շատ կարևոր է մարմնից ստացված ինֆորմացիան, քանի որ մեր մարմինը խոսում է մեզանից առաջ։
Սեմինարի ընթացքում մասնակիցները ծանոթացան , թե ինչպե՞ս է ուղեղը ստիպում մարդկանց որոշակի ժեստեր անել, երկրորդ ի՞նչ է <<ասում>> մեր մարմինը և որն է մեր մարմնի ամենաազնիվ մասը, և վերջում թե ինչպե՞ս կարող են մասնակիցները ժեստերի միջոցով ճանաչել մարդկանց։
Քննարկումների միջոցով մասնակիցները առանձնացրին ժեստեր, որոնց առօրյաում նրանք շատ են հանդիպում։ Այնուհետև ծանոթացան ուղեղի տեսակներից մեկին ՝ «Լիմբիական» կոչվող տեսակին, որը պատասխանատու է մարդկանց մարմնի շարժումների համար։
Հանդիպումը մասնակիցների համար հետաքրքիր էր և արդյունավետ։ Ըստ Սոնայի օրվա թեման շատ կարևոր և արդիական է այսօր․
-Շատ կարևոր է դիմացինի հետ շփվելիս հասկանալ նրա ժեստերից, թե ի՞նչ է մտածում քո մասին, արդյո՞ք նրան հաճելի է շփվել քեզ հետ կամ անկեղծ է խոսում նա տվյալ պահին թե ոչ, - ասում է Սոնա Պապիկյանը և ավելացնում, որ ձեռք բերած գիտելիքները այսուհետ կօգտագործի և ուշադիր կլինի դիմացինի ժեստերի միջոցով նրա անկեղծ կարծիքը հասկանալու համար։
Ըատ Աշխեն Մկոյանի հանդիպումը բավականին հետաքրքրիր անցավ, քանի որ մասնակիցները շատ ակտիվ էին, հետաքրքրված էին թեմայով և հանդիպումից կարևոր ու ոչ կարծրատիպային ինֆորմացիա ձեռք բերեցին։
Հեղինակ` Անուշիկ Ստամբոլցյան
