«Փաստինֆո»-ն գրում է․ «Իրավապահ մարմինները ներգրավված են քաղաքական գործընթացների մեջ, ընդ որում՝ խոսքը չի գնում միայն ընդդիմադիրների նկատմամբ քաղաքական հետապնդումների, Նիկոլ Փաշինյանի կողմից առերևույթ հանցավոր դրսևորումները պարտակելու բացահայտ դեպքերի մասին։
 
ՆԳՆ-ն երեկ հաղորդագրություն տարածեց՝ նախարար Արփինե Սարգսյանը  ծանոթացել է Միգրացիայի և քաղաքացիության ծառայության նոր գրասենյակների շինարարության ընթացքին՝ կից հրապարակելով լուսանկարներ։
 
Հրապարակված լուսանկարներում «Փաստինֆո»-ն նկատել է ՔՊ քարոզչական «սրտիկները»՝ շինարարների սաղավարտների վրա, որոնց լուսանկարները հատուկ ՆԳՆ-ն տարածել էր։ Այսինքն՝ թե՛ շինարարները ունեն քաղաքական հստակ կողմնորոշում ու շինարարությունն անում են ՔՊ-ի քարոզչական լոգոտիպերի  համազգեստով, թե՛ ՆԳՆ-ն է զբաղված դրանց հանրայնացմամբ՝ այդպիսով զբաղվելով ՔՊ-ի քարոզչությամբ
 
ՆԳՆ-ն համարվում է ուժային կառույց, որը պարտավոր է պահպանել քաղաքական չեզոքություն, չի կարող մասնակցել քաղաքական ակցիաների, չի կարող հրապարակային աջակցություն հայտնել որևէ ուժի։ Մինչդեռ  նախօրեին ՆԳՆ պաշտոնյաները, փաստացի, խախտել են օրենսդրական արգելքը ու լծվել ՔՊ-ի քարոզչությանը»։