Հայաստանի Հանրապետության վարչապետ Նիկոլ Փաշինյանն ու նրա տիկինը՝ Աննա Հակոբյանն, առավոտյան կորոնավիրուսի թեստ են հանձնել։
Այս մասին ՀԺ-ի հետ զրույցում ասել է վարչապետի խոսնակ Մանե Գևորգյանը:
«Թեստերը հանձնել են առավոտյան, պատասխանները մոտ 5-6 ժամից կարելի է սպասել: Այսինքն երեկոյան»,-ասաց Գևորգյանը: Խոսնակը նաեւ նշեց, որ վարչապետն ու տիկինը շարունակում են մեկուսացված մնալ Սևանում:
Հիշեցնենք, որ այսօր առավոտյան թեստ հանձնելու մասին վարչապետը դեռ երեկ երեկոյան էր տեղեկացրել Ֆեյսբուքի ուղիղ եթերում: «Մենք այսօր վերնագիր տեսանք, որ Բրազիլիայի նախագահի թեստը դրական է եղել, այսինքն՝ նրա մոտ հաստատվել է կորոնավիրուսը: Աննան, ինչպես գիտեք,մարտի 7-ին հանդիպում էր ունեցել Բրազիլիայի նախագահի տիկնոջ հետ, և նրանց ողջագուրվելու լուսանկարը կա հրապարակված: Այս ամենից հետո եկանք Սևանում մեկուսանալու, և առաջին գործողությունը, որ արել ենք, մեր ջերմությունները չափելն էր: Ջերմություն չունեինք։ Մի քանի անգամ չափել ենք, կրկին չկար ջերմություն։ Հետո եղավ Բրազիլիայի նախագահի պաշտոնական հերքումը: Հայտնել էր, որ թեստի արդյունքը բացասական է եղել: Բայց ամեն դեպքում մեկուսացված կմնանք մենք, իսկ վաղն առավոտյան թեստ կհանձնենք, համոզվելու համար, որ ամեն ինչ կարգին է»,- ասել էր վարչապետը։
Դիտեք նաև՝
