Օրեր առաջ մեդիափորձագետ Սամվել Մարիտրոսյանը Հակոբ Հակոբյանի (Ճոյտ) սցենարով ու պրոդյուսերությամբ նկարահանված «Հիշողություն» ֆիլմի վերաբերյալ գրառում էր կատարել, որում նշել էր, որ հնչեցնում է իր ընկերոջ կարծիքը.
«Խեղճ տղան ջղայնությունից ֆիլմի կեսը ֆբ-ում ստաուս-մատուս է գրել: Ուրեմն. ամեն ինչ սկսում է թուրք տղու ու հայ աղջկա սիրո պատմությունից ու այդ սերիալի սցենարը զուգորդվում է Ցեղասպանության տեսարանների բեմադրությամբ: Ասում է՝ դաժան տեսարաններ բեմադրելուց Ճոյտը ֆանտազիային է զոռ տվել՝ էլ կնոջ կուրծք կտրել, էլ երեխա թունավորել, էլ անտանելի հռհռոց: Մի խոսքի որակի մասին չենք խոսում, իսկ ասելիք ֆիլմը չունի ընդհանրապես»:
Սամվել Մարտիրոսյանի գրառումից հետո մեծ աղմուկ էր բարձրացել համացանցում, ինչը վերջինս խոսքով` կանխատեսելի չէր.
«Որևէ հետևանքի մասին չէի մտածում, դա ուղղակի գրառում էր: Օրվա ընթացքում ես տարբեր թեմաների հաճախ եմ անդրադառնում, առավել ևս, որ ֆիլմի շուրջ քննարկումներ էլ արդեն կային»,- Asekose.am-ի թղթակցի հետ զրույցում ասաց մեդիափորձագետը:
Սամվել Մարտիրոսյանն անդրադարձավ նաև մեր այն դիտարկմանը, թե որքանով է ճիշտ խոսել մի ֆիլմից, որն ինքը դեռ չի տեսել.
«Այստեղ, ճիշտ և սխալի ոչինչ չեմ տեսնում, որովհետև ֆեյսբուքյան էջս իմ անձնական տարածքն է, որտեղ փոխանցել էի ինչ-որ մեկի մտքերը, առավել ևս, որ դրան զուգահեռ նաև ֆիլմի վերաբերյալ մեկ այլ գրառում էլ էի գրել, այսինքն` երկու կարծիք, երկու մոտեցում էի ներկայացրել»:
Նշենք, որ Սամվել Մարտիրոսյանի գրառումից հետո համացանցում նրա հասցեին տարբեր ֆեյսբուքյան օգտատերերի կողմից հնչել էին քննադատություններ, ինչպես նաև վիրավորանքներ, որոնք շատերի կարծիքով արվել էին ֆեյսբուքյան ֆեյքերի միջոցով: Այս մասին մեդիափորձագետն ասաց հետևյալը.
«Գրառումներ կատարողների մեջ և ֆեյքեր, և իրական մարդիկ կային, ինչպես նաև մարդիկ, որոնք իմ կարծիքով «Հիշողություն» ֆիլմի մեջ են ներգրաված և քննադատությունը նրանք ընդունել էին որպես անձնական վիրավորանք»:
Ամփոփելով զրույցը` Սամվել Մարտիրոսյանը պատասխանեց այն հարցին` արդյո՞ք պատրաստվում է այս ամենից հետո դիտել Հակոբ Հակոբյանի «Հիշողություն» ֆիլմը, թե՞ ոչ.
«Ճիշտն ասած ոչ նախկինում, ոչ էլ հիմա չեմ պատրաստվում դիտել ֆիլմը: Թրեյլերը տեսնելուց հետո նայելու լուրջ ցանկություն չառաջացավ»:
Հեղինակ` Լիլիթ Հակոբյան
