Բուլղարիայի Պլովդիվ քաղաքում տեղի է ունեցել «Երիտասարդ ձեռնարկատեր» խորագիրը կրող աշակերտական գործարար ընկերությունների ամենամյա 22֊րդ միջազգային տոնավաճառը և 6֊րդ «Գլոբալ ձեռնարկատիրական մարտահրավեր» (GEC) մրցույթը, որոնք «Ձեռնարկատիրական կրթություն» առարկայի շրջանակներում նախաձեռնել էր ՀՀ ԿԳ նախարարությունը` Բուլղարիայի ԿԳ նախարարությանը կից «Ձեռնարկատիրական կրթության կենտրոնի» (BUCT) և Կենտրոնական և Արևելյան Եվրոպայի ֆրանկոֆոն տարածաշրջանների կենտրոնի (CREFECO) հետ համագործակցությամբ։

Ֆրանկոֆոնիայի միջազգային կազմակերպության (OIF) օժանդակությամբ արդեն երկրորդ անգամ մրցույթն անց է կացվում  նաև ֆրանսախոս սովորողների մասնակցությամբ։ Բուլղարիայում միջոցառման գլխավոր կազմակերպիչներն էին՝ Ձեռնարկատիրական մասնագիտական կենտրոնների ցանցը (BUCT) և Europen-Pen միջազգային կազմակերպությունը: Տոնավաճառ֊մրցույթին այս տարի Հայաստանից մասնակցում էին Երևանի Մանուել Քաջունու անվան թիվ 54 ավագ դպրոցի սովորողներ Միլենա Ամիրխանյանը (12֊րդ դասարան), Սոնա Հարությունյանը (10֊րդ դասարան) և ֆրանսերենի ուսուցչուհի Վերգինե Հարությունյանը։ Հայաստանը ներկայացնող թիմը վերադարձել է մրցանակներով՝ Սոնա Հարությունյանը մրցույթում արժանացել է 1֊ին մրցանակի, իսկ Միլենա Ամիրխանյանը՝ 3֊րդ։

«Հայաստանի Արև» անունը կրող դպրոցի տաղավարն արժանացել է «Ամենաներդաշնակ տաղավար» տիտղոսին։ Իրադարձությունը մեկ անգամ ևս ակնառու է դարձնում դպրոցներում մասնագիտական կողմնորոշման կենտրոնների կարևորությունը, որը կամուրջ է՝ դպրոցից դեպի բարձրագույն ուսումնական հաստատություն։