yerkir.am-ը գրում է. Այսօր լրագրողները ՀՀ պաշտպանության նախարար Սեյրան Օհանյանին հարցրել են սահմանը հատած և Ադրբեջանի կողմն անցած զինվորի մասին: Նա նախ նշեց, որ ադրբեջանցիների կողմից տարածված տեսանյութը, որում սահմանը հատող զինվորն է ու նրա պատասխանները, ակնհայտորեն հակառակորդի կողմից պատրաստված տեսանյութ էր: Սեյրան Օհանյանը նշեց. «Այն պահին, երբ այդ զինվորը լքել էր, մեր զինծառայողներից մի քանիսը տեսել էին, թե ինչպես է նա արագ վազում, չի ստացվել կանխել»: Այդ արարքի պատճառների մասին նախարարը ասաց. «Պատճառները պետք է փնտրել նրա ընտանիքի մեջ: ծառայողական քննություն է նշանակված, և քրեական գործ է հարուցվել, ընթացքում ամեն ինչ կպարզվի: Քանի որ ինքը այստեղ չէ, ուստի ստիպված ենք նրա ընտանիքի անդամների, մտերիմների միջոցով պարզել ամեն ինչ, և արդյուքնների մասին կտեղեկացնենք հանրությանը»: Ինչ վերաբերում է այդ զինվորի հանդեպ ճնշումների մասին լուրերին, նախարարը նշեց. «Եթե ճնշումներ եղել են, ապա իր ընտանիքում են եղել ճնշումներ, նախնական կարող եմ ասել, որ զինվորի և իր ընտանիքի միջև լարված հարաբերություններ են եղել: Ամեն ինչ կպարզվի: Բացառում եմ հրամանատարների կողմից վատ վերաբերմունքը, նա պայմանագրային զինծառայող է եղել, փոքր ստորաբաժանման մեջ, ականանետային, այդ ստորաբաժանման մեջ միջանձնային հարաբերություններ համարյա չեն լինում»: Նախարարը բացառեց նաև նրան առևանգելու տարբերակը:
Նյութը` սկզբնաղբյուր կայքում