«Նոյեմբերի 21-ին Աղասի Այվազյանի մահվան 10-րդ տարելիցն է, մտածում էի, որ նախքան դա նրա տուն-թանգարանն արդեն պատրաստ կլինի, մենք էլ հենց այդ օրը բացումը կանեինք, Աղասին էլ վերևից կտեսնի, որ, այո, ինքը Հայաստանինն է, սակայն պարզվեց, որ նա Հայաստանին պետք չէ»,-Asekose.am-ին ասաց հայ անվանի արձակագիր, դրամատուրգ, ռեժիսոր, գեղանկարիչ Աղասի Այվազյանի այրին` 80-ամյա Գրետա Վերդիյանը:
Ըստ տիկին Վերդիյանի` մարդիկ չեն հասկանում Աղասի Այվազյանի մեծությունը, այն դեպքում, որ եթե նրա գրածի հիման վրա մի ֆիլմ նկարահանեն, ամբողջ աշխարհը կիմանա Հայաստանի մասին.
«Գիտեն «Եռանկյունի»-ն ու վերջ, բայց շատ բաների մասին տեղյակ չեն»:
Հիշեցնենք, որ տիկին Վերդիյանն ավելի վաղ Asekose.am-ին տեղեկացրել էր, որ Աղասի Այվազյանի արխիվն անմխիթար վիճակում է գտնվում, նրա թողած ժառանգությունը պահպանելու և սերնդեսերունդ փոխանցելու համար տուն-թանգարան հիմնելու ցանկություն ունի, սակայն գումար չլինելու պատճառով ստիպված է վաճառել Աղասի Այվազյանի կտավները: Միաժամանակ, տիկին Վերդիյանը չի ցանկանում, որ կտավները երկրից հանվեն:
Տիկին Վերդիյանը մեզ հետ զրույցում նշեց, որ արդեն այս խնդրով խոսել է ՀՀ մշակույթի նախարար Արմեն Ամիրյանի հետ:
«Նախարարն ուշադիր լսեց, ասաց, որ պետք է խնդրի լուծման համար ճանապարհ գտնել, բայց նա դեռ հարցի լուծման տարբերակը չի պատկերացնում: Պարոն Ամիրյանն ասաց, որ սա լուրջ խնդիր է, պետք է մտածի այդ մասին»:
Մասնագիտությամբ մանկավարժ տիկին Վերդիյանի խոսքով` ինքը խնդրի լուծման այլ տարբերակներ էլ է փորձել, սակայն` ապարդյուն.
«Նախարարին դիմելուց բացի` զանգահարել եմ նաև մի քանի քաղաքական գործիչների, այդ թվում` Սերժ Սարգսյանին, սակայն ինձ համար պարզ է, որ նա չի ստացել նամակս, այլ այն ուղարկվել է քաղաքապետարան, որտեղից էլ նույն պատասխան եմ ստանում` համապատասխան տարածք չկա: Խնդրում եմ դեպի օլիգարխներ, մեկենասներ ճանապարհ գտնել, այն դեպքում, որ ես այդ ամենը դատարկ ձեռքով չեմ խնդրում, դրա փոխարեն ես նրանց կհանձնեմ Աղասի Այվազյանի կտավները, որոնք արժեք ունեն: Բարտեր եմ անում` ինձ տարածք տվեք, ես ել ձեզ կտավներ կտամ: Ընդդիմության ներկայացուցիչներն էին եկել, սակայն ոչինչ չեն կարողացել անել, բոլորն էլ թույլ են, իսկ օլիգարխներն էլ փակ են: Մտածում եմ, որ պետք է փորձեմ դիմել Սամվել Կարապետյանին կամ Գագիկ Ծառուկյանին, սակայն չգիտեմ, թե ինչպես պետք է դա անել»:
Վերջերս էլ` հոկտեմբերի 5-ին բացվել է Աղասի Այվազյանի կտավների ցուցադրությունը, սակայն ըստ այրու` ամեն ինչ անցել է շատ լուռ:
«Շատ հուսահատված եմ, արդեն չգիտեմ, թե ինչ անել: Ինձ թվում է, որ եթե որևէ մի օլիգարխ տեսնի կամ տեղեկանա այս ամենի մասին, կօգնի: Պետք է տարածք վարձել, գրքերն ափսոս են, սակայն բոլորը նվեր են ուզում, որևէ մեկը չի ցանկանում գումար ծախսել: Ինքս էլ արդեն վատառողջ եմ, հույսս կորցնում եմ, իսկ դա կյանքիս նպատակն էր, սակայն ոչինչ անել չեմ կարողանում»,-նշեց 80-ամյա Գրետա Վերդիյանը:
Հեղինակ` Լիլիթ Հակոբյան
Կարդացեք նաև` Ինչպես է Աղասի Այվազյանի կինն ուզում հավերժացնել ամուսնու հիշատակը. գրողի այրին օգնության կարիք ունի
