ASEKOSE.am-ը «Դատական դեպարտամենտի «խաչիկյաններն» ու ատկատը» վերնագրով հոդվածում դատական կարգադրիչների ծառայությունում աշխատավարձերի յուրացման գործով նոր մանրամասներ էր ներկայացրել`նշելով, որ տվյալ քրեական գործով անցնող անձանցից մեկը գտնվում է փախուստի մեջ:
Մեզ հայտնի դարձած տեղեկության հավաստիությունը ճշտելու նպատակով ASEKOSE.am-ի թղթակիցը գրավոր հարցում էր ուղարկել ՀՀ Ոստիկանությանը, որին ի պատասխան` ՀՀ ոստիկանության հասարակայնության հետ կապի և լրատվության վարչությունից տեղեկացրել են հետևյալը.
«ՀՀ ոստիկանության քննչական գլխավոր վարչության Երևան քաղաքի ծանր հանցագործությունների քննության բաժնի վարույթում պաշտոնեական լիազորությունները չարաշահելու փաստի առթիվ հարուցված քրեական գործով ներկայումս մեղադրանք է առաջադրվել հինգ անձանց՝ աոանձնապես խոշոր չափերով խարդախություն, պաշտոնեական կեղծիք կատարելու, պաշտոնեական լիազորությունները չարաշահելու համար:
Մեղադրյալներից երեքի նկատմամբ խափանման միջոց է կիրառվել կալանավորումը, մեկ մեղադրյալի նկատմամբ կալանավորումը փոխարինվել է գրավով, իսկ մեկ մեղադրյալի նկատմամբ խափանման միջոց է ընտրվել չհեռանալու մասին ստորագրությունը: Քննությունից թաքնվող մեկ մեղադրյալի նկատմամբ խափանման միջոց է ընտրվել կալանավորումը, հայտարարվել է հետախուզում:
Նույն գործի շրջանակներում խոշոր չափերի խարդախություն կատարելու կասկածանքով 27.08.2013 թ. ձերբակալվել է դատական կարգադրիչների ծառայության ևս մեկ աշխատակից:
Մեղադրյալների անձնական տվյալները հանդիսանում են հրապարակման ոչ ենթակա նախնական քննության տվյալներ, ուստի «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 3-րդ կետի կարգով դրանք չեն կարող տրամադրվել:
Հանցագործությամբ պետությանը պատճառված վնասի չափը ճշտվում է:
Քրեական գործով նախաքնությունը շարունակվում է»:
