Կարեն Հեքիմյանը ֆեյսբուքյան իր էջում գրում է․ «ՈՒրեմն, սրանք իբր ավիաչվերթներ են իրականացնում Երևան-Շարմ էլ Շեյխ ուղղությամբ: Վերջին ավիաչվերթներից մեկը հետաձգվել է շուրջ 24 ժամով: Ըստ «պաշտոնական» վարկածի, հետաձգման պատճառը օդաչուի քնկոտությունն է: Ասում են, որ օդաչուն թռիչքից առաջ քնել է:

Որևէ մեկը չի վիճարկում, որ մարդը քնելու իրավունք ունի: Սակայն, ո՞վ ասաց, որ Երևան-Շարմ Էլ Շեյխ ավիաչվերթի օդաչուն պետք է քնելու իր իրավունքը հենց Երևանում իրագործի: Կամ` արդյո՞ք արդարացված է 24 ժամ տևողությամբ քունը:

Կարծում եմ` սա սովորական քուն չէր: Ենթադրում եմ` օդաչուի խոր և երկարաժամկետ քունը վերջինիս խմածության արդյունք է: Այս իմաստով, շատ լավ է, որ օդաչուն քնած է մնացել: Իսկ ավելի լավ կլինի, որ SkyUp Airlines-ի օդաչուները Հայաստանում քնելու փոխարեն ՈՒկրաինան պաշտպանեն: Հայաստանում առանց իրենց էլ քնածների պակաս չկա»:

***

ՕրագիրՆյուզ-ն էլ գրում է․ «Ուկրաինական «SkyUp Airlines» ավիաընկերությունը, որն իրականացնում Երևան-Շարմ էլ Շեյխ ուղղությամբ: Ընկերությունը վերջին ավիաչվերթներից մեկը հետաձգել է գրեթե 24 ժամով:

Ըստ օդանավակայանի վարկածի, հետաձգման պատճառը օդաչուի հոգնած լինելն է: Օդաչուն թռիչքից առաջ քնել է:

Մեզ հետ զրույցում չվերթի ուղևորներից Արման Կարապետյանը պատմեց, որ սկզբում 2 ժամով հետաձգել են թռիչքը, հետո ասել, որ օդաչուն հոգնած է և քնել է։

«Մեր թռիչքն առավոտյան 7։20 էր։ Մենք երեխաների հետ ժամը 6-ին օդանավակայանում ենք եղել։ Մի քիչ սպասեցինք, հետո ասեցին, որ 9։20 է լինելու թռիչքը։ Հետո 9։30 կողմերն էկան իրանց համար հանգիստ ասեցին՝ գիտեք ինչ կա, օդաչուն եկել ա, հոգնել ա, պետք ա քնի, իրանց իրավունքն ա քնելը, մոտ մի 10 ժամ պետք ա քնի ինքը։ Գնացեք 6-ի կողմերը եկեք, 7։30 նոր թռիչքը կլինի։

Դե մի քիչ խառնաշփոթ սկսեց, ամեն մեկը սկսեց գոռգոռալ, դե պարզա ամեն մեկը պլանավորել էր իր հանգիստը։ Գնացինք ժամը 6-ին եկանք, տեսանք արդեն թռիչքը ժամը 8-ին էին հետաձգել։ Մեծ հաշվով 8։20 էղավ թռիչքը ու տենց մի օրը կորավ հյուրանոցում, 11։20 նոր հասանք հյուրանոց»,- ասաց նա։

Արման Կարապետյանի խոսքով՝ փոխհատուցման մասին դեռ տեղյակ չեն։

«Մենք դեռ Եգիպտոսում ենք, կգանք կհասկանանք։ Աշխատող ենք ունեցել, որ էլի սենց պատմության մեջ ա ընկել այս ընկերության հետ։ Ինքը ոնց որ ամսի 3-ին էր էկել, իրան էլ 10 ժամ ուշացրել էին՝3600 դրամ էին փոխհատուցել։ Վիդեոները, որ քցել էի, պարզվեց, որ լիքը մարդկանց հետ նման պատմություններ ա եղել։ Մի մասին փոխհատուցել են, մի մասին՝ չէ»,-նշեց նա։

Հարցին՝ ուղևորները ողջ ժամանակ սպասե՞լ են օդանավակայում, նա պատասխանեց․
«Աշխատողները որոշ մարդկանց հյուրատուն ուղարկեցին, չգիտեմ մանրամասն։ Մենք գնացինք տուն, հետո էկանք։

Չգիտեմ մեր օդանավակայնը ոնց ա աշխատում այս ընկերության հետ, որ անընդհատ նման խնդիրներ է ունենում։ Եթե ինչ-որ ընկերություն անընդհատ նման խնդիրներ է ստեղծում, ուղղակի մի աշխատեք հետը»»։