Ինչպես արդեն հայտնի է, վերջերս թուրքական մամուլը տեղեկություն էր հրապարակել, որի համաձայն` հայազգի լուսանկարիչ Արա Գյուլերը «Դողուշ» հոլդինգի հետ պայմանագիր է կնքել, որով թուրքական ընկերությանն անցնելու է Արա Գյուլերի ողջ արխիվը։ Անդրադառնալով այս թեմային` օրերս Արա Գյուլերն Asekose.am-ին ասաց, որ տեղեկությունը չի համապատասխանում իրականությանը.
«Կըսես՝ այդպե՞ս են գրել...Չգիտեմ, թե ո՞ր էշուն ձեռքի գործն է այդ լուրերը տարածելն, ի՞նչ քաք կա դրա տակ...»,- նշեց Արա Գյուլերն ու վստահեցրեց, որ իր լուսանկարները չեն կարող որևէ ընկերության պատկանել, քանի որ «դրանք աշխարհինն են»:
Արա Գյուլերի պնդմամբ` արխիվի մասին որևէ խոսակցություն չկա, պարզապես տրապիզոնցի թուրք իր մտերիմի հետ պայմանավորվածություն ունի, որ հետևելու է Ստամբուլի կենտրոնում՝ Իստիկլյար պողոտայում գտնվող Ara Kafe-ի կառավարումը, քանի որ ինքն այլևս չի կարող զբաղվել դրանով:
Asekose.am-ի և Արա Գյուլերի զրույցից հետո թուրքական Cumhuriyet-ը գրել է, որ Արա Գյուլերը չեղյալ է հայտարարել իր և «Դողուշ» հոլդինգի միջև կնքված պայմանագիրը։ Արդեն չեղյալ հայտարարված պայմանագրի համաձայն` Արա Գյուլերը ստացված գործարքի արդյունքում ամսական ստանալու էր 50 հազար լիրա։ Բացի այդ, «Դողուշ» հոլդինգին էր անցնելու այն շենքը, որում գտնվում է Ara Kafe-ն և Արա Գյուլերի լուսանկարչական ապարատների հավաքածուները։
Asekose.аm-ն այսօր կապ հաստատեց Սփյուռքի նախարարության հետ` պարզելու` արդյո՞ք իրենք Արա Գյուլերի արխիվի վերաբերյալ նմանատիպ պայմանագիր կնքելու ցանկություն ունեն, թե` ոչ:
«Բնականաբար, նման նկատառումներ կան, բայց այս պահին քայլերի մասին չեմ կարող ոչինչ ասել: Մշտապես խոսվում է, որ անհրաժեշտ է հետևողական քայլեր ձեռնարկել, որ դրսում ունեցած ազգային հարստությունները տեղափոխվեն Հայաստան, սակայն Արա Գյուլերի վերաբերյալ որևէ հստակ բան չեմ կարող ասել: Հիշեցնեմ, որ մի քանի տարի առաջ Արա Գյուլերը բազմաթիվ նկարներ նվիրեց Հայաստանին, իհարկե, դա իր ամբողջ արխիվը չէր, այստեղ էլ ցուցահանդես իրականացվեց: Ընդհանուր առմամբ, տենդեցը հետևյալն է` նախարարությունը հնարավորինս հետամուտ է Սփյուռքում եղած ազգային արժեքները Հայաստանում հանգրվան գտնելու հարցով, սակայն այս պահին Արա Գյուլերի վերաբերյալ չեմ կարող ասել որևէ խնդիր քննարկվել է, թե ոչ, ինքս տեղյակ չեմ»,-ասաց ՀՀ սփյուռքի նախարարի մամուլի քարտուղար Սեյրանուհի Գեղամյանը:
Արա Գյուլերի արխիվի հետագա ճակատագրի վերաբերյալ Asekose.am-ը փորձեց պարզաբանում ստանալ նաև Մշակույթի նախարարությունից, սակայն ի պատասխան մեր հարցմանը` խնդրեցին այն ուղարկել գրավոր տարբերակով, որպեսզի իրենք կարողանան արագ պատասխանել.
«Ավելի արագ պատասխան ստանալու համար պետք է հարցումն ուղարկեք գրավոր, որովհետև կա ընթացակարգ, որը մենք չենք կարող խախտել»,- տեղեկացրեցին Մշակույթի նախարարությունից:
Հիշեցնենք, որ «Տեղեկատվության ազատության մասին» ՀՀ օրենքի 9-րդ հոդվածի համաձայն` քաղաքացիների տեղեկություն ստանալու գրավոր հարցմանը պատասխան տրվում է այն ստանալուց հետո 5-օրյա ժամկետում, բացառությամբ լրացուցիչ աշխատանք պահանջող տեղեկատվության (30-օրյա ժամկետ):
Հավելենք, որ Asekose.am-ի թիմը Ստամբուլում էր «Կտոր M Հայաստան» հեռուստահաղորդման նկարահանումների նպատակով և այդ շրջանակում էր հանդիպել «Ստամբուլի աչքին»:
Հաղորդումը եթերում կլինի հունվարից:
Հեղինակ` Լիլիթ Հակոբյան
Կարդացեք նաև` Ատոնց գլուխները ջարդի՞մ, ի՞նչ անիմ…Արա Գյուլերը չեղյալ է հայտարարել կասկածելի պայմանագիրը
